Libro 4
Dzi zily nac Ñgyoozh; zeꞌ mbecy, dzi gyidz dey: Tub riidz ni Moisees
90
Ñgyoozh, Shuaan de̱, ru nac ru lugaar nu rza̱ de̱ nu laa lagya̱nese gulas, gal nu dub laa tiem.
2 Anzir nu saꞌ lagy ru de too bicy, anzir nu zuub ru gyiꞌ gyishlombecy,
ru nil nac ru Ñgyoozh nese de tiem nu bi bded,
nunu ru nac ru Ñgyoozh dela tiem nu yad par lo.
3 Ru ricy ru nu de mbecy gyayu dey tuubaꞌ tir.
Orzeꞌ rniir lo dey: “De ru mbecy cush cya der
nu gyac ru yu tuubaꞌ tir.”
4 Tub miily ñaꞌn, ndeꞌ tub dzi zi par ru.
Tiem nu bi bded nañ gal na naag.
Nañ gal nu na tub tiem miꞌ ni rel.
5 Gal nu ricy nis yu ornu rza nuñ la coz,
ni mod zaꞌ lor de mbecy.
Mod nu zu dey nañ gal nu na pcaal.
Na dey gal nu na gyish.
Or napor orzeꞌ driib ñi.
6 Orzeꞌ raly ñi.
Gazeꞌ nu rbic ñi gyee.
Na or gudze orzeꞌ rziiñ
nunu rawach ñi.
7 Nu nac nu rzi lagy ru lo̱ de̱, ndeꞌ nu mnit lo̱ de̱.
Tonaꞌ la rdzib de̱ nu nac nu rchaꞌ ic ru.
8 Ru za mbi la rgüiir de cyi nu ricy de̱.
Nap rad lagy ru mas ngach ricy de̱ cyi.
9 Nu nac nu rzi lagy ru, orzeꞌ yashub lo yu̱ de̱.
Rlazh ñaꞌn de̱, gal nu ricy bi nu ryash lagy de̱.
10 Gayon zub tii ziꞌl ñaꞌn gzu̱ de̱.
Benu ruub de̱, orzeꞌ gzu̱ de̱ cyaal gaynal zub gal rub tii ñaꞌn.
Tees ga ub coz deet ziꞌl nunu ricy shni de̱ lat de tiem zeꞌ.
Sij ziꞌl, orzeꞌ bi za dela ñaꞌn de̱.
Orzeꞌ sacaꞌ de̱.
11 ¿Cyu gad lagy la coz gzac de̱
ornu ru rzi lagy ru nu nac de coz a̱ꞌ nap nu ricy de̱?
Mas rdzib de̱, tees, ¿cyu gad lagy la coz gac ornu ru rchaꞌ ic ru?
12 Blyuu ne̱ de̱ nu nap duꞌ cuena̱ la be gaal tiem gac lo yu̱ de̱,
gun orzeꞌ gyac de̱ mbecy nu yuꞌ shcab ni.
13 ¿La be ruꞌ tiem nu gazi lagy ru lo̱ de̱?
Ñgyoozh, gushni lagy de̱ ya̱, mbecy nu ricy de coz nu ru rniir.
14 Bicy nu gad lagy nap la̱ de̱ nu zaab rca lar de̱ ya̱ de dzi la
gal nu lazh napor la,
gun orzeꞌ dul de̱ lor,
nunu gyet lagy de̱ dub laa tiem lat nu mbañ de̱.
15 Dela tiem nu bzac deet de̱ nunu bicy shni de̱,
niꞌ ziꞌl tant tiem cuic ru ne̱ de̱ nu gzu cyit lagya̱.
16 De̱ ya̱ mbecy nu ricy de coz nu rniir,
bicy nu zac de̱ de coz ily nu ricy ru.
Bicy nu zac de iꞌñ de̱ nu gruu zac par lo de coz ily nu rac ricy ru.
17 Ñgyoozh, biñ nu driib zily de̱,
bicy nu gyicy de̱ gan lat dela coz nu ricy de̱.