Tub riidz ni Etán, yu nu nac mbecy ezraíta
89
Ñgyoozh, dub laa tiem dula̱ lor nu ru zaab rca lar mbecy.Ya̱ rne̱e̱ lo de mbecy nu ru ricy paar par tub la.
2 Gun ya̱ rne̱e̱, ornu ru rcar mbecy, ndeꞌ par tub la.
Gal nu gya baa, niꞌ ziꞌl tant nu rcar dey.
3 Ru mniir, ornu nar: “Ya̱ bicya̱ tub trat nu moz ne̱, Dabi, tub yu nu bzu chu̱.
Orzeꞌ mne̱e̱ loy nu
4 famil niy nu yad par lo, ya̱ zeeña̱y rey par tub la.
Ya̱ gyicya̱ nu gyub ic famil niy par tub la.”
5 Ñgyoozh, Shuaan de̱, dela de mbecy gyibaa
rul dey nu dzi coz nap ricy ru,
nunu dela de anc rul dey nu ru dzi ricy paar.
6 Ñgyoozh, Shuaan de̱, sac cyu nu na gal nu na ru gyibaa.
Ni tub la mbecy nu yuꞌ gyibaa wasaap yu ru.
7 De mbecy nu zu lat junt nir gyibaa, rdzib lagy dey lor.
Dela dey tonaꞌ la rdzib lagy yu lor.
8 Ñgyoozh, Shuaan de̱, biñ nu riib ic zañ nac de anc zigy,
ni tub la mbecy a̱ꞌ fert yu gal nu fert ru.
Ru ricy paar lat dela coz nu rac.
9 Nisyudoo dzi fert ñi, tees ru riib ic ruñ.
Ornu dzi ricy de nguuly nu rded loñ, orzeꞌ ru ricy ru nu rariñ.
10 Ru brich ñgyeꞌr bañ dañ nu la Rahab, nunu biit ru ma.
Bicy ru gan de losaꞌ yuur nu yaa fert nir.
11 Gyibaa, ndeꞌ nac ñii coz nir.
Niꞌ ziꞌl gyishlombecy nac ñii nir.
Ru psaꞌ lagy ru gyishlombecy nu dela coz nu yuꞌ loñ.
12 Ru psaꞌ lagy ru dela yu nu ri par yaa been ornu güiin par zeꞌ nu driib doo güidz,
nunu ru psaꞌ lagy ru dela yu nu ri par yaa reg na.
Too bicy Tabor, nu too bicy Hermon nañ gal nu na mbecy
ornu rul yu lor nu nac nu yet lagy yu.
13 Dzi ga coz ily rac ricy ru.
Nu dzi fert shic ru.
14 Cyong gyel fushtiz nir, ndeꞌ nu ricy ru de coz nap nunu ricy ru de coz nu seꞌñ.
Lo dela coz nu ricy ru, orzeꞌ rabee nu rcar de mbecy nunu ricy paar nu dey.
15 Ornu de mbecy rul yu,
dzi ni dey benu rad lagy yu lac mod griib zily yu ru, Ñgyoozh.
De yu zeꞌ chesay lat yaa nu druu lor.
16 Gua la dzi yet lagy dey nu nac ru.
Driib zily dey ru nu nac nu dzi nap ru.
17 Ru nac ru gyel lily ni fers ni dey.
Ru ricy ru nu ricy de̱ gan gyiꞌ nu dzi rcar de̱.
18 Ñgyoozh, Shuaan de̱, biñ yon ni de mbecy Israeel,
ru pcuir mbecy nu ña de̱ ya̱.
Ru briic ru rey ne̱ de̱.
19 De moz nu bicy paa nir bdeꞌ lo dey gulas.
Orzeꞌ mniir lo dey, ornu nar: “Ya̱ blocyuuba̱ tub soldad lily.
Ya̱ pcui̱ tub yu lat de mbecy nu riib ic nu zeeña̱ yu nu gyub ic yu.
20 Ya̱ bzeeña̱ moz ne̱ Dabi nu gac yu rey ornu pco̱o̱ asecy tooy.
21 Orzeꞌ dub laa tiem grica̱ fers niy.
Dub laa tiem gyicy ferta̱ yu.
22 De losaꞌ yuuy rila wayicy dey gan yu.
De mbecy a̱ꞌ nap rila wac gyicy dey nu gruu gyel mbecy niy nu gnit loy.
23 Ya̱ grich ñgye̱ꞌ de losaꞌ yuuy.
Duta̱ de mbecy nu rzi lagy loy.
24 Rca̱ yu, nunu gyicy pa̱a̱ du̱ yu.
Gyicya̱ nu gyicy yu gan.
Ya̱ gric zira̱ fers niy.
25 Ya̱ gyicya̱ nu gyub ic yu
gash lañ gal ruꞌ nisyudoo Mediterraneo
nu gashtal ruꞌ gyoow Eufrates.
26 Orzeꞌ yu zeꞌ niiy lo̱: ‘Ru Tat ne̱, nu Ñgyoozh ne̱.
Ru biñ nu nac lugaar fert, zeꞌ nu cha̱ laa lagya̱,
nunu ru nac ru biñ nu co mbañ ya̱’, niiy.
27 Ya̱ gyicya̱ nu dugyiy de coz nu ca lo cuen nu dugyi mdoo loga.
Gyicya̱ nu gya zir gzuy par deꞌ zir de rey.
28 Zaab ca̱a̱ la̱ yu dub laa tiem.
Nunu trat nu gyicy du̱ yu ndeꞌ gzuñ par tub la.
29 Gal nu baa zuñ tub la, niꞌ ziꞌl gyiyeeñ famil ni rey par tub la.
Dub laa tiem gyiyeeñ tub ga famil ni rey.
30 “Se benu de nez yu nu gruu zac par lo,
wazuub gyidag dey ni leey ne̱,
nunu benu wayicy dey gal nu mne̱e̱,
31 benu wayicy cuen dey ni de riidz nu lyu̱u̱ niy,
nunu benu wayicy paay nu de raso̱o̱ nu bdu̱ꞌ yaay nu gyicy yu,
32 orzeꞌ nu nac cyi nu gyicy dey, ya̱ grica̱ cashtig niy.
Nunu gyicya̱ nu gzac ziy nu nac nu gyicy dey de coz a̱ꞌ nap.
33 Tees Dabi, wayeca̱ nu ca̱ yu.
Nunu wanit lagya̱ nu gyicy yaca̱ nu de riidz nu mne̱e̱ loy.
34 Rila watilya̱ trat nu bicy du̱ yu.
Wacha̱a̱ ni tub riidz nu mne̱e̱ nu waded la gyicya̱.
35 Tub tir ziꞌl mne̱e̱ de riidz zeꞌ loy,
nunu bzata̱ uba̱ par nu gabe nu waded la gyicya̱ gal nu mne̱e̱.
Ya̱ rila wagu̱u̱ Dabi.
36 Dub laa tiem gyicya̱ nu zu tub famil niy,
nunu gyicya̱ nu famil niy gyiyeeñ yu rey dub laa tiem
lat nu ca ba ni doo güidz.
37 Gal nu tub la ca beey baa, niꞌ ziꞌl tub la gac nez yu rey.
Gyiyeeñ yu rey dub laa lat nu zu baa”, na Ñgyoozh.
38 Ñgyoozh, na ru rzi lagy ru lo rey nu pcuir.
Orzeꞌ bzaan ruy, nunu mneꞌr yu.
39 Laab ru ptiily ru trat nu bicy nur yu.
Zeꞌ nac yu moz nir.
Na pshet lag ru coron niy lo yu.
40 Ru ptiily ru loꞌ nu zu dub yub la ruꞌ gyedz ledz yu,
nunu bicy ru nu mnit lo de lugaar fert nu rcyiiñ niy.
41 Dela mbecy nu rded nez nu riib lugaar zeꞌ
ricy gubaan dey de coz niy.
Zeꞌ de mbecy nu yuꞌ gaab ga rigy nu dey yu.
42 Ru bicy ru nu bicy de losaꞌ yuuy gan yu,
nunu bicy ru nu bet lagy de mbecy nu bicy gan zeꞌ.
43 Ru bicy ru nu bdo̱ꞌw ruꞌ mandzicy niy,
nunu wansaan ru gzuy lo gyel yuu.
44 Ru bloor bashto̱o̱ yaay,
nunu gal lo yu pshet ru yashily nu rzub yu ornu ricy yu gyel fushtiz.
45 Ru bicy ru nu byaguush yu anzir nu shuub tiem niy,
nunu tonaꞌ la bloor gyel mbecy niy.
46 Ñgyoozh, ¿la be ruꞌ tiem cach lor lo de mbecy nir?
¿La be ruꞌ tiem cui boo ni gyel rzi lagy nañ lardoor?
47 Ñgyoozh, bicy nu gyezaꞌ lagy ru nu de̱ ya̱ a̱ꞌ tuñ la yu̱ꞌ de̱.
Byezaꞌ lagy nu ru psaꞌ lagy ru de̱ ya̱ mbecy nu yuꞌ gyishlombecy ii.
48 Ni tub la mbecy wazuy tub la.
Dela dey gat yu.
Ni tub la mbecy wac gyicy yu nu cueꞌ gyay zeꞌ nu yuꞌ de mbecy gut.
49 Ñgyoozh, ¿lagu wagyicy ru coz nap
par nu gabe nu rcar de̱ ya̱ gal nu bicy ru gulas?
¿Ca bicy ru de riidz nu mniir lo Dabi nu waded la gyicy ru?
50 Ñgyoozh, cueꞌ nit lagy ru nu rgubdzaa zañ nac mbecy de̱ ya̱,
gun de̱ ya̱ naca̱ mbecy nu ricy coz nu ru rniir.
Rzac zi̱ de̱ nu nac de riidz nu rnii de mbecy nu a̱ꞌ yuꞌ lo ru.
51 De losaꞌ yuur rsuriidz dey rey nu ru pcuir, Ñgyoozh.
Rgubdzaa dey yu ca ziꞌl zeꞌ nu rded yu.
52 Gyabic den gyel mbecy ni Ñgyoozh par tub la.
¡Laab ni gac ñii!
¡Laab ni gac ñii!