“Blocyuub ya̱, Ñgyoozh”: tub riidz ni de nez Coré
88
Ñgyoozh, Shuaan de̱, ru nac ru biñ nu rboo mbañ ya̱.Dzi rel la drishti̱ du̱ ru nu locyuub ru ya̱.
2 Bzuub gyidag de riidz nu rne̱e̱ lor.
Bzuub gyidag ornu rne̱e̱ lor nu locyuub ru ya̱.
3 Se ñumiiñ ziꞌl nu ñgyata̱ nu nac nu zañ tonaꞌ la coz deet bzaca̱.
4 Na̱ gal nu na mbecy nu bi riib cuen lat de mbecy nu bi zuu la nu gat.
Blazh la fers ne̱.
5 Nañ gal nu na nu bi bzeeñ mbecy ya̱ lat de añ.
Na̱ gal nu na mbecy nu biit dey lat gyel yuu.
Na bi ri̱ gyerbaa.
Na̱ gal nu na mbecy nu rila wagyezaꞌ gaꞌ lagy ru,
na gal nu na mbecy nu bi blaa yaar.
6 Ru mneꞌr ya̱ gal iiñ gyerbaa.
Mneꞌr ya̱ zeꞌ nu gyi zir ni gyerye, zeꞌ nu cow zir nu yuꞌ de mbecy gut.
7 Ya̱ rze̱e̱ nu zaab shica̱ tub yuu nu tonaꞌ la ye nu nac nu rzi lagy ru lo̱.
Nunu rze̱e̱ nu par re par ii la rneꞌ nis yu ya̱ nu nac nu rzi lagy ru lo̱.
8 Ru bicy ru nu de losa̱ꞌ nu rded du̱ bzaan dey ya̱.
Bicy ru nu riñ lagy dey ya̱.
Na ri noowa̱.
Wac grib dze̱.
9 Na bet cow lo̱ nu nac nu dzi ricya̱ sentiir.
Ñgyoozh, Shuaan de̱, de dzi la drish ti̱ du̱ ru,
nunu rshes nañ ya̱a̱ nu rne̱e̱ du̱ ru.
10 ¿Walab gaal nu gyicy ru nusuriidz par de mbecy nu bi gut?
¿Walab gaal nu gac gyeshte dey nu griib zily yu ru?
11 A̱ꞌ nii mbecy nu ru zaab rca lar de añ nu yuꞌ gyerbaa.
A̱ꞌ nii mbecy nu dzi ricy paar gal zeꞌ nu yuꞌ de mbecy gut.
12 A̱ꞌ zac mbecy de nusuriidz nu ricy ru gal zeꞌ nu cow.
Ni waczac mbecy nu ru dzi nap ru gal lugaar zeꞌ nu rnit lagy ru mbecy.
13 Ñgyoozh, Shuaan de̱, ya̱ drishti̱ du̱ ru nu locyuub ru ya̱.
De dzi la, or napor, rne̱e̱ du̱ ru.
14 Ñgyoozh, Shuaan de̱, ¿lagu mneꞌr ya̱?
¿Lagu walagy ru güiir lo̱?
15 Tonaꞌ la rzac zi̱ nese miiñ la̱.
Nese miiñ la̱ se nu gat ga̱ ziꞌl la̱.
Na wagagye̱e̱ ga̱ꞌ nu dzi coz ily ricy ru nu rzac zi̱.
16 Ya̱ rze̱e̱ nu bi byadat la̱ lo yu, nu nac nu dzi rzi lagy ru lo̱.
Bi rnit lo̱ nu dzi fert pshet yaar ya̱.
17 De dzi la dri loꞌ de coz deet zeꞌ ya̱ gal nu ricy nis yu tiem nu dzi yet gyey.
Ndeꞌ nañ gal nu na de losaꞌ yu̱u̱, ornu dub yub la yad yu lo̱.
18 Ru bicy ru nu de amig nap ne̱ bzaan yu ya̱.
De losa̱ꞌ nu gusa du̱ niꞌ ziꞌl bzaan dey ya̱.
Na ca ziꞌl lugaar nu zu̱ cow la rabee.