De mbecy Jerusaleeng gyabic dey gyel mbecy ni Ñgyoozh: tub riidz ni de iꞌñ Coré
87
Gyedz nu bzaa Ñgyoozh zub ñi too bicy Sión,
bicy yon nim.
2 Ñgyoozh rcam dela gyedz nu yuꞌ Israeel,
tees dzi zir rcam ub la gyedz Jerusaleeng.
3 De ru mbecy nu rcyiiñ gyedz ni Ñgyoozh,
bzuub gyidag der ornu rniim.
Orzeꞌ nam:
4 “Gazaꞌ mbecy Egipto yuꞌy lat de mbecy ne̱,
nu mbecy Babilonia,
nu mbecy Filisteo,
nu mbecy Tiro,
gal nu mbecy Etiopia.
Gyicya̱ nu dela de yu zeꞌ nac dey mbecy Jerusaleeng”,
na Ñgyoozh.
5 Orzeꞌ nii mbecy nu de yu nu bruu zañ lugaar dugyi dey gyedz Sión,
nunu Ñgyoozh,
biñ nu gac gyicy dela coz,
gzu fert mi de nu nii.
6 Ñgyoozh zaam tub lisht ni dela mbecy.
Orzeꞌ niim nu dela dey nac yu mbecy guledz.
7 Orzeꞌ de mbecy brugyiꞌ rulgyiꞌy nunu rul yu.
Orzeꞌ brugyiꞌ rnii dey:
“Dela de coz nap nu rad ni den druuñ gyedz Sión”,
na dey.