“Ñgyoozh, blocyuub de̱”: tub riidz ni Dabi
86
Ñgyoozh, bzuub gyidag ne̱,nunu locyuub ru ya̱ ornu reñ ru de coz nu rne̱e̱,
gun ya̱ naca̱ mbecy shni, nunu wac güi̱i̱ uba̱.
2 Cueꞌ zaan ru nu gata̱, gun ya̱ ricy pa̱a̱ ni ru.
Bloo mbañ ya̱,
gun ya̱ naca̱ tub yu nu ricy de coz nu rlagy ru,
nunu ricy cupa̱ consuel lor.
3 Ru nac ru Ñgyoozh ne̱.
Ndeꞌ nu gushni ñuu lagy ya̱.
Gun gua la dzi rne̱e̱ duu̱ ru.
4 Ñgyoozh, Shuaan de̱, ya̱ tub mbecy nu ricy de coz nu rlagy ru.
Ndeꞌ nu bicy nu gyet lagya̱, gun ya̱ rne̱e̱ du̱ ru.
5 Ñgyoozh, Shuaan de̱, tonaꞌ la nap ricy nur de̱,
nunu ricy sulagy ru ne̱ de̱.
Dub laa tiem zaab rca lar de mbecy nu rnii nu ru.
6 Ñgyoozh, Shuaan de̱, bzuub gyidag ornu rne̱e̱ du̱ ru,
nunu locyuub ru ya̱ ornu drishti̱ du̱ ru.
7 Ya̱ drishti̱ du̱ ru ornu rzac deeta̱,
gun ru locyuub ru ya̱ ornu rne̱e̱ du̱ ru.
8 Sac reñaꞌ ñgyoozh nu gyicy gal nu ricy ru, Ñgyoozh, Shuaan de̱.
Sacaꞌ cyu nu bicy gal nu bicy ru.
9 De lo la nez mbecy nu psaꞌ lagy ru, dela de yu zeꞌ
cyid dey nu zu tib yu lor,
nunu gyabic dey gyel mbecy nir nu nac nu dzi zily nac ru.
10 Ru dzi fert ru, nunu tonaꞌ la coz ily ricy ru.
Tub zi la ru nac ru Ñgyoozh.
11 Ñgyoozh, Shuaan de̱, blyuu ne̱ lac mod rlagy ru nu gyicya̱.
Orzeꞌ gyicy pa̱a̱, ornu zuub gyidaga̱ nir.
Blyuu ne̱ lac mod gyicya̱.
Orzeꞌ nu dutuub la lardo̱o̱ zu bicha̱ nu nac ru.
12 Orzeꞌ nu dutuub la lardo̱o̱ gyabica̱ gyel mbecy nir, Ñgyoozh, Shuaan de̱,
gun ru nac ru Ñgyoozh ne̱.
Ya̱ rne̱e̱ nu zily nac ru par tub la.
13 Dzi ga coz ily nu zaab rca lar ya̱.
Bi zu̱ la̱ gal ruꞌ gyerbaa ni de mbecy gut.
Orzeꞌ ru bloo nap ru ya̱.
14 Ñgyoozh, de mbecy leꞌ za dey contr ne̱.
Tub nac mbecy dañ rlagy dey cut yu ya̱.
De yu zeꞌ wagyicy cuen dey ru.
15 Zeꞌ ru, Shuaan de̱, nac ru tub Ñgyoozh nu rca de̱ ya̱,
nunu rashni lagy ru de̱.
Nunu dzi guly rchaꞌ ic ru.
Dub laa tiem ricy ru tub mod gugy nu gabe nu zaab rca lar de̱ ya̱,
nunu ricy paar nu de̱ ya̱.
16 Orzeꞌ da lo̱ tuubaꞌ tir.
Orzeꞌ gushni lagy ya̱.
Doo fers ne̱, nunu bloo mbañ ya̱,
gun ya̱ rzu bicha̱ nu nac ru, dub gal na mod nu bicy ñaꞌ ne̱.
17 Ñgyoozh, Shuaan de̱, blyuu tub muesht lo̱, par nu gad lagya̱ nu nap ru.
Orzeꞌ gruu gyel mbecy ni de mbecy nu rzi lagy lo̱
ornu gzac dey nu briic ru consuel ne̱,
nunu locyuub ru ya̱.