Ñgyoozh, bloo mbañ de mbecy nir tuubaꞌ tir: tub riidz ni de iꞌñ Coré
85
Ñgyoozh, Shuaan de̱, ru dzi bicy ru coz nap nu de mbecy,de mbecy nu rcyiiñ lo yu nu bloo sur nu gac nir,
gun ru dzi rashni lagy ru dey.
Bicy ru nu gup de mbecy Israeel tuubaꞌ tir.
2 Ru bi psoow sur lo de cyi nu bicy dey.
Bi bicy sulagy ru dela coz a̱ꞌ nap nu bicy dey.
3 Bi gucar nu rdzaꞌr ni dey.
Na bicy nu gyag zir lagy ru gyiꞌ nu guzi lagy ru loy.
4 Ñgyoozh biñ nu rboo mbañ de mbecy, bicy nu gyacub de̱ tuubaꞌ tir.
Pcyaag ic ru lo̱ de̱.
5 ¿A guzi lagy ru lo̱ de̱ par tub tir ziꞌl?
¿A rila wayecar nu rzi lagy ru mas gal lo de losa̱ꞌ nu gruu zac par lo?
6 Ñgyoozh, waded la cuic ru fers ne̱ de̱, ¿shiñ?
Orzeꞌ de̱ ya̱ mbecy nir, gyet lagy de̱ nu nac coz nu gyicy ru.
7 Ñgyoozh, Shuaan de̱, bicy nu gad lagy de̱ nu zaab rca lar de̱ ya̱ nunu bloo mbañ de̱.
8 Ya̱ reña̱ de coz nu rnii Ñgyoozh, Shuaan na.
Mi zeꞌ rniim nu cuic mi gyel ri zu ni de mbecy nu bloo sum nu gac nim.
Ni gyicy num dey benu checay nu ricy yu de coz ton.
9 Waded la mi zeꞌ bi zu lily mi, nu co mbañ mi de mbecy nu rdzib lagy lom.
Orzeꞌ gyiyeeñ gyel lily nim ledz den.
10 Gyel rca ni Ñgyoozh, nu coz rishli nim ndeꞌ tub ziꞌl nañ.
Mbecy nu gyicy coz nu seꞌñ, orzeꞌ gad gyel ri zu niy.
11 Gyishlombecy ii gyicy paa de mbecy nu Ñgyoozh.
Zeꞌ gal gyibaa gyicy nap mi de mbecy nim.
12 Orzeꞌ Ñgyoozh zeed mi de coz nap,
nunu gad sheñ cosech ni den lo yu ii.
13 Na ornu mbecy ricy dey de coz nu seꞌñ,
orzeꞌ ndeꞌ nañ gal na nu ricy nap dey tub nez nu ded mi.