Dzi ga cyit na yuꞌ yon ni Ñgyoozh: tub riidz ni nez Coré
84
Ñgyoozh, biñ nu gya zir zu par dela, dzi ga cyit na yuꞌ yon nir.2 Ñgyoozh, Shuaan de̱, ric la añ ne̱ nu rlagya̱ gzu̱ nañ yuꞌ yon nir gashtal rsuun lañ ya̱.
Nu dutuub la lardo̱o̱ rdula̱ lor, nu nac nu dzi yet lagya̱.
3 Mas gal de shlec bzaa ma teez ma gaab ga yuꞌ yon nir.
Laab zeꞌ yuꞌ de chiling,
gun rlagy de ma nu gyiyeeñ de mdoo ni ma gaab ga zeꞌ nu zu cuug nir, Ñgyoozh nu riib ic zañ nac de anc zigy.
Ru nac ru fushtiz ne̱, nunu nac ru Ñgyoozh ne̱.
4 Dzi ni de mbecy nu zaab zu lay nañ yuꞌ yon nir.
Orzeꞌ dub laa tiem rul dey lor.
5 Dzi ni de mbecy benu lo ru cyish loy nu cuic ru fers niy.
De yu zeꞌ rlal dey zay nez nu rca zup par too bicy Sión.
6 Na ornu ded dey gyerlas wach ni Nis Urlo,
orzeꞌ Ñgyoozh ricy mi nu driib nis.
Gun bi bet gyey loga.
Orzeꞌ pchaañ de gyel ni nis.
7 De yu zeꞌ fert yu, tees lat nu zaab za dey nez, orzeꞌ ya fert zir yu.
Gazeꞌ nu zac dey Ñgyoozh, biñ nu gya zir zu.
8 Ñgyoozh, biñ nu riib ic zañ nac de anc zigy, Ñgyoozh nu byub ic Jacob,
bzuub gyidag ne̱ ornu rne̱e̱ du̱ ru.
9 Ñgyoozh, nap bicy nu rey, gun ru pcuir yu nu gac yu rey ne̱ de̱.
10 Nap zir nu gzu̱ tub dzi nañ yuꞌ yon nir, gazeꞌ nu chesa̱ tub miily dzi reñaꞌ lugaar.
Yet zir lagya̱ nu gzu̱ roꞌ wedz ni Ñgyoozh ne̱ gazeꞌ nu cyiiña̱ lat de mbecy a̱ꞌ nap.
11 Ñgyoozh rlyuum yaa lo̱ de̱, nunu zaab ic mi de̱.
Nap ricy num de ub na.
Ricy mi nu rca lagy de mbecy lon.
Wacam ni tub la coz ni de mbecy, de yu nu ricy de coz nu seꞌñ.
12 Ñgyoozh, biñ nu riib ic zañ nac de anc zigy, dzi ni de mbecy nu ricy cup consuel lor.