Asaf rgyiiñ yu lo Ñgyoozh nu locyuub mi de mbecy nim lat gyel yuu
83
Ñgyoozh, cueꞌ soow ruꞌr.Cueꞌ gzu rir.
Nunu cueꞌ gyicy ru nu rag ziꞌl zuñ nir.
2 Güii, de losaꞌ yuur bi zu lily dey nu gyicy yu gyel yuu.
De mbecy nu rzi lagy lor cyid dey contr nir.
3 Ngach ro dey riidz ben lac mod gyicy nu dey de mbecy nir.
Rboo ic dey lac mod gyicy nuy de mbecy nu ru rñar.
4 Orzeꞌ rnii dey: “Da der, gun nit lon de mbecy Israeel.
Orzeꞌ de mbecy Israeel dunit lagy dey par tub la”, na dey.
5 Ricy dey tub ziꞌl riidz nunu rsaap dey riidz nu zañ nac mbecy ornu cyid yu contr nir.
6 Gash lañ: de mbecy Edom nu de mbecy Ismaeel, de mbecy Moab, nu de mbecy nez Agar,
7 de mbecy Gebal, nu Amon, nu Amalec, nu de mbecy Filisteo, nu mbecy Tiro.
8 Niꞌ ziꞌl de mbecy Asirio nac nuy de mbecy Moab, nu de mbecy Amon, gal nu de mbecy nu briich Lot.
9 Bicy nu de yu zeꞌ gal nu bicy nur de mbecy Madian,
gal nu bicy nur Sisara,
gal bicy nur Jabin ruꞌ gyoow Cisón.
10 Bicy ru gan dey lugaar ni Endor.
Zeꞌ gubish cuerp ni dey guudz ñi lo yu.
11 De yu nu riib ic dey, bicy nuy gal nu bicy nur de mbecy Oreb, gal nu de mbecy Zeeb.
Gyicy ru gan dela fushtiz ni dey gal nu bicy nur de mbecy Zeba, nu de mbecy Zalmuna.
12 Gun de yu zeꞌ mnii dey nu ñgyicy niy de lugaar nu rcyiiñ de mbecy ni ru Ñgyoozh.
13 Ñgyoozh, ptush las dey gal nu drush las yu gyedz ornu driib don.
Neꞌñ dey gal nu rza tub gyizh wach lo bi.
14 Gal nu rnit lo gyi dela yag nu nash ngush, gal nu rnit loñ dela logyiꞌ,
15 nu gyey bi nir chiib ru dey, nu gyey bi ily, gal nu guzii nir.
Ni mod gzab ru ich dey.
16 Ñgyoozh, bicy nu gat lo dey.
Bicy nu nii dey nu ru dzi zily nac ru.
17 Dzi ga nap benu gruu gyel mbecy ni dey nunu benu dzib yu par tub tir ziꞌl.
Dzi ga nap benu waca lagy mbecy lo dey gal shuub la dzi nu gat yu.
18 Dzi ga nap benu gyet lag dey cuen nu tub zi la ru nac ru biñ nu gya zir zu.
Tub zi la ru riib ic ru dutuub la gyishlombecy.