Ñgyoozh biñ nu riib ic: tub riidz ni Asaf
82
Ñgyoozh riib ic mi lat junt ni de fushtiz nim.
Orzeꞌ bicy tublaazh mi dey nu zaꞌ lom niy.
Orzeꞌ nam:
2 “¿La be ruꞌ tiem rlagy ñi
par nu gzuub der gyiꞌñ nu gyicy ru gyel fushtiz nir mod nu seꞌñ?
¿La be ruꞌ tiem,
gabee cha der faboor ni de mbecy a̱ꞌ nap
anzir nu gyicy ru gyel fushtiz nu de mbecy nap?
3 Bicy gyel fushtiz par de mbecy shni,
gal nu ni de mbecy sac uz.
Bicy mod nu seꞌñ nu mbecy nu rzac zi
nu nac reñaꞌ mbecy gal nu de mbecy nu wagac ca ub.
4 Bloo nap de mbecy shni,
gal nu de mbecy wagac ca ub.
Bloo nap de yu zeꞌ yaa de mbecy a̱ꞌ nap.
5 “Tonaꞌ la nac der mbecy nu rila wagad lagy.
Tonaꞌ la ton na der.
Ga ub coz a̱ꞌ nap ziꞌl ricy ru.
Rlyu nu mnit gyel fushtiz gyishlombecy.
6 Orzeꞌ ya̱ mne̱e̱ nu gazaꞌ de ru ñgyoozh,
nunu dela de ru nac ru iꞌñ ya̱,
Ñgyoozh,
biñ nu gya zir zu.
7 Tees de ru niꞌ ziꞌl gat der gal nu rat deꞌ zir mbecy.
Gat der gal nu rat gur fushtiz la”,
na Ñgyoozh.
8 Ñgyoozh,
da gun gyub ic ru de mbecy nu yuꞌ gyishlombecy,
gun dela mbecy,
mas ca ziꞌl lugaar nu gruuy,
tees ca ni gaal nac dey nir.