Ñgyoozh dzi nap mi mas mbecy Israeel a̱ꞌ nap dey: tub riidz ni Asaf
81
Brish ti der lo Ñgyoozh, biñ nu briib zily Jacob,nu nac nu dzi yet lagy ru,
gun mi zeꞌ nac mi fers ni den.
Biily der nunu byabic gyel mbecy nim.
2 Psiigy der de gyiib ni musiic, nunu pshet der lo gyid.
Bloo der tub di lo beeñ arpa nu lo beeñ salterio.
3 Blaa der trompet par nu chuꞌ den saꞌ
ornu rca beey miꞌ gal nu ornu bi bzu rel ma.
4 Gun ndeꞌ tub leey ni de mbecy Israeel.
Ndeꞌ tub mandaar nu mnii Ñgyoozh, biñ nu briib zily Jacob.
5 Briic mi leey zeꞌ ni de losaꞌ See
ornu pshet yaam de mbecy Egipto.
Orzeꞌ reña̱ nu zaab tiꞌ tub mbecy nu a̱ꞌ yu lo̱.
Orzeꞌ rniiy:
6 “Ya̱ psheta̱ yuu nu ca ich ru.
Ya̱ bicya̱ nu bet chicyiw ich ru, chicyiw nu psaar suu.
7 Lat nu bzac zir, orzeꞌ bredz ru ya̱.
Orzeꞌ ya̱ bloo mbaña̱ de ru.
Mne̱e̱ du̱ de ru lat guzii.
Bicya̱ preb de ru lugaar zeꞌ nu driib nis ni Meriba.
8 De ru mbecy ne̱, bzuub gyidag der lat nu rshuu du̱ ru.
De ru mbecy Israeel, dzi ga nap benu zuub gyidag der ne̱.
9 Rila cueꞌ griib zily der tuubaꞌ ñgyoozh.
10 Gun ya̱ Ñgyoozh, Shuaan ru, biñ nu bloo de ru lo yu ni Egipto.
Pshaa ruꞌ der.
Orzeꞌ ya̱ goowa̱ de ru.
11 “Tees de mbecy ne̱ wangalagy dey zuub gyidag yu ne̱.
De mbecy Israeel wangalagy dey gyicy yu gal nu mne̱e̱.
12 Orzeꞌ ya̱ “O” mne̱e̱ nu gyicy dey
dub gal na mod nu rlagy lardoo cyigy ni dey.
Pshet ica̱ nu gyicy dey la ziꞌl coz nu rlagy yu.
13 Dzi ga nap benu de mbecy ne̱, zuub gyidag dey ne̱.
Dzi ga nap benu gash dey nez nu rlagya̱.
14 Benu ni gyicy dey, orzeꞌ ya̱ dzach gyicya̱ gan de losaꞌ yuuy,
nunu ya̱ shet yaa de mbecy nu rlagy chucoo nu dey.
15 “Orzeꞌ de mbecy nu rzi lagy lo̱, dzib lagy dey nunu zu tib yu lo̱.
Nunu rila wac ruu chu dey lo cashtig nu grica̱ niy.
16 Orzeꞌ ya̱ goowa̱ de ru mbecy ne̱, nu trig nap zir par lo dela trig,
nunu gyicya̱ nu gyel ni der nu dziñ doo ni bez ngush.”