Ñgyoozh, bicy nu nu cush cya de̱ nu gyicya̱ gal nu bicy de̱ gulas: tub riidz ni Asaf
80
Ñgyoozh, ru nac ru biñ nu rña de mbecy Israeel.Orzeꞌ na bzuub gyidag ne̱ de̱.
Ñgyoozh, ru rbic ru nez ni de mbecy nu nac nez See
gal nu ricy mbecy nu rña de shily,
nu rlyuuy nez ni shily niy.
Orzeꞌ bzuub gyidag.
Ru zub ru lo yashily nir, zeꞌ nu rbic ru gyel fushtiz,
par ic zeꞌ nu zu de anc querubines.
2 Bicy nu gruu zac gyel lily nir lo de losa̱ꞌ,
de yu nu nac nez Fraiing,
nu de yu nu nac nez Benjamiing,
nu de yu nu nac nez Manasés.
Bicy nu gzac de̱ nu dzi fert ru.
Da gun co mbañ ru de̱ ya̱.
3 Ñgyoozh, bicy nu cush cya̱ de̱ nu gyicya̱ gal nu bicy de̱ gulas.
Nap bicy nu de̱, gun orzeꞌ gruu mbañ de̱.
4 Ñgyoozh, biñ nu riib ic zañ nac de anc zigy,
¿la be ruꞌ tiem gazi lagy ru
nu nac de riidz nu rnii de mbecy nir ornu nii nu dey ru?
5 Na tonaꞌ la ricy de̱ sentiir nu nac cashtig nu briic ru nu bda̱w bdo̱ꞌ de̱.
Nunu bicy ru nu bruu sheñ nis urlo̱ de̱.
Ndeꞌ taz nu bzuub ru ru̱ꞌ de̱.
6 De reñaꞌ nez mbecy, de mbecy nu yuꞌ gaab ga,
ru bzaan ru nu chucoo dey nu losaꞌy,
gun orzeꞌ gad lagy dey cyu gani de yu nu ri lugaar zeꞌ.
De losaꞌ yu̱u̱ de̱ rnii ziy ne̱ de̱.
7 Ñgyoozh, biñ nu riib ic zañ nac de anc zigy, bicy nu cush cya̱ de̱
nu gyicya̱ gal nu bicy de̱ gulas.
Gushni lagy de̱ ya̱ gun orzeꞌ gruu mbañ de̱.
8 De̱ ya̱ na de̱ gal nu na lyucy urbyay nu bloor Egipto.
Orzeꞌ ru pcyuu nur de mbecy nu yuꞌ lo yu nir.
Orzeꞌ mnuuz ru de lyucy zeꞌ.
9 Orzeꞌ ru guꞌn ru lugaar zeꞌ nu mnuuz ruñ par nu galy ñi.
Orzeꞌ gyi pshet lyuñ.
Orzeꞌ bzu laañ dutuub la lo yu ni de lugaar zeꞌ.
10 Orzeꞌ briic ñi gaꞌl dela logyiꞌ.
Briic ñi gaꞌl gashtal psoow lañ lo dela ya gyicy ily.
11 Ptiily yaañ.
Orzeꞌ gul ñii gal ruꞌ nisyudoo.
Niꞌ ziꞌl gal ruꞌ gyoow Eufrates gul yaañ.
12 Orzeꞌ na, ¿lagu ptiily ru loꞌ nu bzu dub yub la ruꞌñ?
Na cyu ziꞌl mbecy nu rded gyernez rac rshet dey urbyay niñ.
13 De cuch gyish, na rzuub gyiꞌ ma tooñ.
Zeꞌ de bañ gyish, na rac row ma de urbyay niñ.
14 Ñgyoozh, biñ nu riib ic zañ nac de anc zigy, “O” mnii.
Da güiir de lyucy urbyay nir nese gal gyibaa,
15 lyucy nu mnuuz ru nu yaa beer,
lyucy nu ru nap bicy cuidad ru.
16 De losaꞌ yu̱u̱ de̱ pshiꞌñ dey ñi.
Orzeꞌ pcaa dey gyiñ.
Tañ bgüii lo dey.
Bicy nu nit lo de yu zeꞌ, Ñgyoozh.
17 Zeꞌ de mbecy nu ru pcuir, cueꞌ zaan ru nu la coz zac dey.
Cueꞌ zaan ru nu zac de mbecy nir la coz, de yu nu bicy fert ru.
18 Ni gyicy ru, gazeꞌ nu rila wayeca̱ de̱ nu yap ca̱ ich ru tuubaꞌ tir.
Cuic ru gyel mbañ ne̱ de̱, gun orzeꞌ gyabic de̱ gyel mbecy nir.
19 Ñgyoozh, biñ nu riib ic zañ nac de anc zigy, bicy nu cush cya̱ de̱
nu gyicya̱ gal nu bicy de̱ gulas.
Gushni lagy de̱, gun orzeꞌ gruu mbañ de̱.