Ornu mnit lo Jerusaleeng: tub riidz ni Asaf
79
Ñgyoozh, de mbecy nu a̱ꞌ yu lo ru guꞌ dey lo yu nir.Bicy bag dey yuꞌ yon nir.
Mnit lo dey Jerusaleeng.
Orzeꞌ bruu dey yay.
2 Bzeeñ dey cuerp ni de mbecy nir nu gow lyash yu.
Bzeeñ dey cuerp ni de mbecy nu bzu bich nu nac ru nu gow bañ gyish yu.
3 Gal nu rshu mbecy nis, ni pshu dey reñ de mbecy nir.
Gal nu ya nis gyoow, ni ya reñ dey dutuub la lat gyedz Jerusaleeng.
Wangyeeñaꞌ la mbecy nu cach dey de añ.
4 Tub nacaꞌ de mbecy nu rcyiiñ gaab ga rab zi dey de̱ ya̱.
Rigy naañ dey, nunu rgubdzaay de̱.
5 Ñgyoozh, Shuaan de̱, ¿a gazi lagy ru lo̱ de̱ par tub tir ziꞌl?
¿A wagyag la ic ru lo̱ de̱ gal nu wagyu tub gyi?
6 Pcoo de gyel rzi lagy nir too de mbecy nu a̱ꞌ yuꞌ lo ru,
gal nu de mbecy nu wagnii nu ru,
7 gun bdow dey de mbecy nir, nunu mnit lo dey ledz de̱.
8 Cueꞌ cuic ru cashtig ne̱ de̱ ya̱,
nu nac de cyi nu bicy de gyitoo bel ne̱ de̱.
Gushni lagy de̱ ya̱, gun blazh la consuel ne̱ de̱.
9 Ñgyoozh, biñ nu rboo mbañ de mbecy, blocyuub de̱,
gun orzeꞌ de mbecy gyabic dey gyel mbecy nir.
Bloo nap de̱, nunu bicy sulagy ni de cyi nu bicy de̱,
gun orzeꞌ griib zily de mbecy ru.
10 De tub nacaꞌ mbecy, walabaꞌ raso̱o̱ de coz nu rnii dey rab yu de̱ ya̱.
Orzeꞌ rniiy: “¿Ca zu Ñgyoozh ni der na?” rnii dey.
Na lo rgüi̱i̱ la̱ de̱ bicy nu dey
laabaꞌ gal mod nu bicy de ub yu nu de mbecy nu rzu bich nu nac ru.
11 Ñgyoozh, bduꞌ cuen ornu ricy shni de yu nu ri pres.
Nu nac fers ni ru, orzeꞌ gyicy ru nu gla de mbecy nu a̱ꞌ ca lo cuen nu gat.
12 Ñgyoozh, Shuaan de̱, de tub nacaꞌ de mbecy, ru cuic ru cashtig ni dey.
Gagy tant cuic ru ni tub nac ga de riidz nu mni zi dey nir.
13 Gazeꞌ nu de̱ ya̱, mbecy nu ru rñar, gal nu rña mbecy tub nac shily,
orzeꞌ gric de̱ gras nir par tub la.