Ñgyoozh blocyuub mi de mbecy nim: tub riidz ni Asaf
78
De ru losa̱ꞌ, nap bzuub gyidag der ornu rlyu̱u̱ nir.Nap bduꞌ cuen der de riidz nu driib ru̱ꞌ.
2 Ya̱ rne̱e̱ nu riidz cyit
ornu rshaal la̱ de riidz ni de coz nu guc gulas.
3 De riidz zeꞌ rniiñ de coz nu güeñ den nunu gud lagy na,
gun de ndeꞌ mnii de yu bel ni den lon.
4 De riidz ii, wacach ruꞌ den ñi lo de iꞌñ na.
Nii den lo de iꞌñ na nu Ñgyoozh ni den dzi fert mi.
Zat den de coz nu bicy mi gun orzeꞌ griib zily dey mi.
Orzeꞌ gzat den de coz ily nu bicy mi.
5 Mi zeꞌ briic mi leey nim ni de mbecy Israeel.
Mniim de coz nu rlagy mi nu gyicy de losaꞌn.
Nunu mniim lo de too bel ni den nu lyuu dey leey zeꞌ ni de iꞌñ yu,
6 gun orzeꞌ de iꞌñ dey nu yad par lo gad lagy dey ñi.
Na de yu zeꞌ lyuu gaꞌ dey ñi ni iꞌñ yu,
7 gun orzeꞌ cyish lo dey lo Ñgyoozh,
gun orzeꞌ cueꞌ nit lagy dey de coz nu bicy mi,
tees gyicy yac dey nu de riidz nu mniim nu gyicy yu.
8 Gun cueꞌ nu gyicy dey, gal nu bicy de too bel niy.
Gun de too bel ni dey guc yu mbecy cyigy too,
nunu mnid ruꞌ dey.
Rila wangyicy cup nap dey consuel lo Ñgyoozh,
nunu wangyicy paa dey nuy mi nañ lardooy.
9 Dzi nu gucoo de soldad nu guaz nu gyech niy,
de yu nu nac nez Fraiing,
orzeꞌ gush dey carer.
Bruu chuy lo gyel yuu.
10 Wangyicy yac dey nu de riidz nu mnii Ñgyoozh nu gyicy yu.
Wangalagy dey nu zuub gyidag yu de leey nim.
11 Mnit lagy dey de coz nu bicy mi
gal nu de nusuriidz nu bzaac dey nu bicy mi.
12 Gun de too bel ni dey bzaac urlo lay
ornu Ñgyoozh bicy mi nusuriidz lacy Zoán, tub lugaar ni Egipto.
13 Mi zeꞌ blew mi nisyudoo.
Orzeꞌ bded num dey lo yu wach.
De nis bzu liñ.
Orzeꞌ pcaañ ruꞌ yuu rup laꞌ la.
14 Na or widoo, orzeꞌ blyuum nez ni dey
nu nac tub nac za baa nu zaab too dey.
Zeꞌ dub laa rel, orzeꞌ blyuum nez ni dey nu nac yaa ni tub gyi.
15 Bicy mi nu bet rich tub gyitaꞌ ily lugaar ub zi.
Orzeꞌ sheñ tonaꞌ la nis briib.
Orzeꞌ guud nis goꞌ de mbecy.
16 Bicy mi nu briib nis ich tub gyitaꞌ ily.
Orzeꞌ pshu nis.
Byac ñi tub gyoow.
17 Mas ni bicy mi,
tees gabee bicy ruꞌ dey cyi nu guch ñii niy lo Ñgyoozh, biñ nu gya zir zu.
Nunu gua dey contr nim lugaar ub zi.
18 Ornu pcaa dey Ñgyoozh nu cuic mi coz nu gusht ni dey nu gow yu,
orzeꞌ nu bicy nap la dey preb mi.
19 Nu mnii zi dey ni Ñgyoozh
ornu mniiy: “¿A gac cuic Ñgyoozh coz nu dow den lugaar ub zi?”
20 Mas guc bicy mi nu briib nis ich gyitaꞌ ornu pshet mi ich ñi,
zeꞌ na: “¿A gac cuic mi gyishtily nu beel nu gow de mbecy nim?”, na dey.
21 Ornu güeñ Ñgyoozh de riidz nu mnii dey,
orzeꞌ guzi lagy mi.
Gyel rzi lagy nim nañ gal nu na gyi.
Orzeꞌ ndeꞌ pcoom ñii too de mbecy Israeel,
22 gyiꞌ nu wangyicy cup dey consuel lom,
nunu wancheña lagy dey nu mi zeꞌ co mbañ mi yu.
23 Mas ni, tees orzeꞌ mniim lo baa,
nunu bicy mi mandaar loñ nu gyal ñi gal nu ryaal tub roꞌ.
24 Bicy mi nu bet gyit mana nu bdow dey.
Ndeꞌ nañ gal nu na uub nguzh
nu bruuñ gal baa nu briic mi ni dey.
25 Bdow dey gyit nu row de anc.
Ñgyoozh briic mi ndeꞌ bdow dey gal byel la ni dey.
26 Nunu bicy mi nu bruu bi par zeꞌ nu driib doo güidz.
Nu nac fers nim bicy mi nu bruu bi par yaa reg na
ornu zun güiin par zeꞌ nu driib doo güidz.
27 Orzeꞌ bicy mi nu bet de chigyiñ lat de mbecy nim.
Bañ zigy tonaꞌ la bet.
Gal nu nguaa yu uzh ruꞌ nis yu doo, ni gucua ma.
28 Bicy mi nu bet de ma gazel zeꞌ nu yeche dey.
Bet ma dub yub la zeꞌ nu zub yuꞌ negy ni dey.
29 Orzeꞌ Ñgyoozh briic mi de coz nu rlagy dey gow yu.
Orzeꞌ de mbecy bdow gyel la dey.
30 Gabee yuꞌ beel ruꞌ dey nu row yu,
orzeꞌ rlagy zir dey loñ.
31 Orzeꞌ bdzaꞌ Ñgyoozh ni dey.
Orzeꞌ bicy mi nu gut de yu feñ fert zir nu yuꞌ lat dey.
Orzeꞌ bicy lam nu gut de yu feñ nu yalagy zir na lat de mbecy Israeel.
32 Mas ni bicy mi, tees de mbecy gabee bicy dey cyi.
Mas bicy mi zañ nusuriidz,
tees wangyicy cup dey consuel lom.
33 Orzeꞌ bicy shub mi lo yu dey,
gal nu ricy bi nu tub nez rded ziꞌl ñi.
Orzeꞌ bicy mi nu sij ziꞌl bruꞌña tub gyel zi.
Orzeꞌ bzaꞌ loñ dey.
34 Ornu bicy mi nu gut dey,
na de yu nu byeeñ, orzeꞌ bicy dey coz nu rlagy mi tuubaꞌ tir.
Byub dey mi nu dutuub la lardooy,
nunu bruu chu dey lo de cyi nu bicy yu.
35 Nunu byezaꞌ lagy dey nu mi zeꞌ Ñgyoozh, biñ nu gac gyicy dela coz,
nunu mi zeꞌ zaab ic mi dey.
Byezaꞌ gaꞌ lagy dey nu gua güiim yu.
Orzeꞌ bloom dey lo coz rishdzidz.
36 Tees ga uub la riidz rguu mnii dey.
Wannii lay ni tub coz rishli.
37 Wangyicy paa dey nuy mi.
Ni wangyicy yac dey de trat nu bicy nuy mi.
38 Tees Ñgyoozh gushni lagy mi de mbecy nim.
Bicy sulagy mi de cyi nu bicy yu.
Orzeꞌ wanit lom dey.
Zañ tir bicy mi tub fers nu cueꞌ gazi lagy mi lo dey.
Bicy mi tub fers nu cueꞌ gyidzaꞌm ni dey.
39 Orzeꞌ byezaꞌ lagy mi nu nac dey mbecy nu wacyiiñ tuñ gyishlombecy ii.
Na dey gal nu na bi nu nez rded ziꞌl ñi.
Orzeꞌ sacaꞌñ.
40 ¿La be la tir gua dey contr nim, de lugaar ub zi?
¿La be la tir bicy dey nu bicy shnim?
41 Zaab ricy la dey preb Ñgyoozh yon ni de mbecy Israeel.
Orzeꞌ bicy dey nu gutow nim.
42 Mnit lagy dey nu dzi fert mi,
nunu mnit lagy dey tiem nu bloo mbañ mi dey yaa de losaꞌ yuuy.
43 Nunu mnit lagy dey de coz ily nu bicy mi,
gal nu de nusuriidz ily nu bicy mi lacy ni Zoán lo yu ni Egipto.
44 Bicy mi nu nis gyoow byac ñi reñ.
Orzeꞌ wangad nis goꞌ de mbecy Egipto.
45 Bzeed mi byung lat dey.
Orzeꞌ bicy de ma nu bzac ziy.
Nunu bzeed mi bigy.
Ma zeꞌ mnu ma ledz dey.
46 Bzeed mi de gushagy nu bdow ma de ya mni ni dey,
nunu par nu mnit lo ma de ya mni nu mnuuz yu.
47 Bicy mi nu pchach gyey gye de lucy urbyay ni dey.
Zeꞌ gup nu bya gyey ndeꞌ pchaach ñi de ya las niy.
48 Biit mi chigud ni dey nu gyey gye.
Zeꞌ nu guzii biit mi de shily niy.
49 Mi zeꞌ bicy mi nu tonaꞌ la bzac zi dey
nu nac nu guzi lagy mi loy nunu bdzaꞌm.
Orzeꞌ bzac deet dey.
De cashtig zeꞌ briic ñi nu gad lagy de mbecy nu gat yu.
50 Wanchecam nu rzi lagy mi lo dey.
Ni wansaan mi nu cyiiñ mbañ yu.
Sinu bicy mi nu gut dey nu tub güii rca.
51 Bicy mi nu gut dela mdoo loga nu yuꞌ de lo yu ni Egipto.
Bicy mi nu gut dela mdoo loga nu yuꞌ lat nez mbecy Ham.
52 Bloom de mbecy nim, de mbecy Israeel,
yeed num dey gal nu ricy tub mbecy nu ryeed nuy tub nac shily niy.
Blyuum nez ni dey lat nu bded yu de lugaar ub zi.
53 Orzeꞌ ya num dey tub lugaar nu sac rishdzidz, lugaar nu wadzib yu.
Orzeꞌ nisyudoo bgoñ too de losaꞌ yuuy.
54 Orzeꞌ ya num dey lo yu nu bri reñ mi nu gac nim.
Nunu gua num dey par too bicy nu ub lam bloom.
55 Pcyuu num de mbecy guledz zeꞌ lat nu zaab za de mbecy nim ornu yay.
Orzeꞌ blew mi de yu zeꞌ nu briic mi ni tub nac ga de mbecy Israeel.
Nunu briic mi yuꞌ ni de mbecy zeꞌ nu gani de mbecy nim.
56 Mas ni bicy Ñgyoozh,
tees bishcya dey ich mi, biñ nu gac gyicy dela coz,
nunu bicy dey preb mi.
Wangalagy dey nu zuub gyidag yu de coz nu mniim nu gyicy yu.
57 Guc dey mbecy nu bishcya ich Ñgyoozh.
Gush dey reñaꞌ mod, nunu guc dey mbecy wagyicy paa
gal nu bicyaꞌ ziꞌl de gyitoo bel ni dey.
Na dey gal nu na tub ya gyech dzong.
Gal na mbecy rded nu guaz, zeꞌ wagyicy cup yu consuel loñ.
Ni na dey.
58 De lugaar nu briib zily dey reñaꞌ ñgyoozh, zeꞌ bicy dey nu pchaꞌ ic Ñgyoozh.
Bicy dey nu tonaꞌ la guzi lagy mi nu nac de nab nu briib zily dey.
59 Ornu bzaac Ñgyoozh de coz zeꞌ,
orzeꞌ blaa yaam dey par tub tir ziꞌl.
60 Orzeꞌ bzeeñ mi yuꞌ negy yon nim nu zub Silo,
zeꞌ nu pcyiiñ mi lat dey.
61 Orzeꞌ pshet ic mi nu de losaꞌ yuu dey bdub yu caj ni trat nu bicy num dey.
Caj zeꞌ nac ñii tub muesht ni fers nim, gal nu gyel lily nim.
62 Nu nac nu tonaꞌ la guzi lagy mi,
orzeꞌ bzeeñ mi de mbecy nim
par ruꞌ mandzicy ni de losaꞌ yuuy.
63 De yu feñ delay gut yu lat gyel yuu.
Orzeꞌ sac la cyu nu chelaa de fiñ feñ.
64 De uz nu bicy riiñ ni Ñgyoozh gut dey lo mandzicy.
Zeꞌ de byud ni dey wangyicy la dem sentiir.
65 Ñgyoozh bicy mi gal nu ricy mbecy
ornu cyish yu yaa nu ptaas yu.
Bicy mi gal nu ricy mbecy fert
ornu rgyish yu yaa nu goꞌy ñup ni urbyay.
66 Gazeꞌ nu bicy mi nu bya ich de losaꞌ yuu de mbecy nim.
Gush dey carer nu bruu chuy lom.
Orzeꞌ ndeꞌ tub tir ziꞌl par tub la bloom gyel mbecy ni dey
ornu bicy mi gan yu.
67 Tees Ñgyoozh wancuim de mbecy nez See.
Ni wancuim de mbecy nez Fraiing,
68 sinu pcuim de mbecy nez Juda.
Orzeꞌ pcuim too bicy ni Sión, tub bicy nu tonaꞌ la rcam,
69 par nu zaa de mbecy yuꞌ yon nim.
Orzeꞌ bzaa dey tub yuꞌ yon gal nu na yuꞌm nu zub ledz mi gyibaa.
Bicy mi nu fert zuñ gal nu fert zu gyishlombecy,
nunu bicy mi nu a̱ꞌ rishdzidz zuñ par tub la.
70 Orzeꞌ pcuim Dabi, tub mbecy nu gzu bich nu nac mi.
Bloom yu zeꞌ nu row de shily gyizh,
71 nu de zeꞌ nu mñay ma niy.
Orzeꞌ bicy mi nu byac yu rey ni de mbecy Israeel,
gun orzeꞌ ñay de mbecy ni Ñgyoozh.
72 Orzeꞌ Dabi mñay de mbecy nu dutuub la lardooy,
nunu blyuuy nez ni de mbecy gal mod nu rlagy ñi.