Riidz nu rbic consuel tiem nu deet rac: Tub riidz ni Asaf
77
Ya̱ drishti̱ du̱ Ñgyoozh.Ye drishti̱ gun dzi ga gyeñ mi ne̱.
2 Tiem nu rac deet ya̱ rne̱e̱ dum.
Gua la rel pshes nañ ya̱a̱ nu mne̱e̱ dum.
Tees wangad la consuel nañ lardo̱o̱.
3 Gyi la ryeed añ ne̱ ornu drusha̱ shcab nu nac Ñgyoozh,
nunu rshiꞌñ ña baloor ornu dzi drusha̱ shcab.
4 Ñgyoozh, gua la rel wansaan ru nu dasa̱.
Za la ti̱ꞌ nu tantaꞌ deet rac nañ lardo̱o̱.
5 Drusha̱ shcab nu nac de coz nu bi bded.
Orzeꞌ ryezaꞌ lagya̱ de coz nu guc gulas.
6 Rel, orzeꞌ nap rduꞌ cuena̱ la na de coz nu yuꞌ nañ lardo̱o̱.
Nap drusha̱ shcab.
Orzeꞌ rne̱e̱ nañ lardo̱o̱:
7 “¿A mneꞌ Ñgyoozh de ub na par tub tir ziꞌl?
¿A rila wayicyaꞌm nap nu de ub na tuubaꞌ tir?
8 Na, ¿a gucam nu rcam de ub na?
¿A wayicy yacaꞌm nu de riidz nu mniim nu waded la gyicy mi na?
9 ¿A mnit lagy mi de tiem nu gushni lagy mi de ub na?
¿A rzi lagy mi loon, lugaar nu gashni lagy mi ub na?” mne̱e̱ nañ lardo̱o̱.
10 Orzeꞌ mne̱e̱ nañ lardo̱o̱: “Coz nu bicy zir ñi nu dzi ratow ne̱,
ndeꞌ nu Ñgyoozh pchaam mod nu gyicy num den”, mnii to̱o̱.
11 Na ya̱ gyicya̱ nu gyezaꞌ lagya̱ de coz ily nu bicy mi.
Gyicya̱ nu gyezaꞌ lagya̱ de nusuriidz ily nu bicy mi gulas.
12 Na caa ica̱ dela coz ily nu bicy ru, Ñgyoozh,
nunu fert la grusha̱ shcab nu nac ñii.
13 Ñgyoozh, dela mod nu ricy nur mbecy, ndeꞌ mod nu tonaꞌ la nap.
Sac tuubaꞌ ñgyoozh nu dzi zily nac gal nu zily nac ru.
14 Ru nac ru biñ nu ricy nusuriidz.
Ru rlyuur ni de lo la nez mbecy nu yuꞌ gyishlombecy nu dzi fert ru.
15 Nu nac nu dzi fert ru,
orzeꞌ bloo mbañ ru de mbecy nir, de mbecy nu nac nez Jacob nu See.
16 De nis gyoow bzaac ñi ru Ñgyoozh, gal nu rzac tub mbecy.
Orzeꞌ gudzib ñi.
Iiñ nisyudoo gush bis ñi, gal nu rash bis tub mbecy ornu rdzib yu.
17 De za nu taꞌ baa pshuñ nis gyey.
Mnii guzii gal baa,
nunu bzu gyi ni guzii par dutuub la.
18 Mnii guzii lat tub don ily.
Gyi ni guzii zeꞌ briic ñi yaa dutuub la gyishlombecy.
Briib duru.
Orzeꞌ pcueñ lo yu.
19 Ru bded ru lo nisyudoo.
Bded ru lo nisyudoo zeꞌ nu dzi gyi ri nis.
Zeꞌ wacabee ti taꞌ gyiꞌr lo yu.
20 Ru yeed nur de mbecy nir, gal nu ryeed nu tub mbecy tub nac shily niy.
Zeꞌ Moisees nu Aroong de yu zeꞌ byub ic yu.