Ñgyoozh gyicy mi gan: tub riidz ni Asaf
76
De mbecy Juda yuꞌ lo dey Ñgyoozh.
De mbecy Israeel rca lagy dey lom.
2 Mi zeꞌ zum Jerusaleeng.
Zeꞌ rcyiiñ mi bicy Sión.
3 Lugaar zeꞌ pcyicy mi gyech ni guaz nu bzeed de losaꞌ yuum.
Pcyicy mi mandzicy ni dey.
Blaꞌm de yala she nu rsoow cuerp ni dey.
Mnit lom dela gyib nu rcyiiñ par nu chucooy.
4 Ñgyoozh,
tonaꞌ la zily nac ru.
Cyit zir rabeer gazeꞌ de too bicy nu zub par tub la.
5 De soldad balient,
na bloo mbecy dela coz nu bicy cup yu.
Na nguaa dela dey gut yu.
Se la la pcyiiñ ñi ni dey
mas fert yu nunu lily na dey guc yu.
6 Ñgyoozh,
biñ nu briib zily Jacob,
ornu ru pshuu nur dey,
orzeꞌ de soldad guton la dey.
Zeꞌ de cuay ni dey guchuꞌ ton la ma.
7 Na dela mbecy rdzib lagy dey lo ru,
Ñgyoozh.
Ni tub la mbecy wazu dey lor ornu rzi lagy ru.
8 Gashtal gyibaa ru rniir ca na mbecy yuꞌ falt niy.
De mbecy nu yuꞌ gyishlombecy ii rdzib dey.
Orzeꞌ guchuꞌ riy
9 ornu bzaꞌ lor de coz zeꞌ.
Orzeꞌ co mbañ ru de mbecy nu yuꞌ gyishlombecy ii,
de yu nu bzac deet nu nac losaꞌy.
10 Gyed gyel mbecy nir nu nac nu rzi lagy mbecy lor.
Mas ñumiiñ rzi lagy dey,
ndeꞌ gyac ñi gal nu na tub coron nu zub toor.
11 Na de ru mbecy,
de coz nu mnii der nu waded la la cuic ru ni Ñgyoozh,
na briic der ñii nim.
De ru mbecy nu yuꞌ gaab ga cyid nu der coz nu cuic ru nim.
Gun na dela mbecy rdzib lagy dey lom.
12 Na gyicy mi nu gat de yu nu riib ic,
nunu chiib mi de rey nu gya zu.