Ñgyoozh gri beem ni de mbecy: tub riidz ni Asaf
75
Ñgyoozh tonaꞌ la dric de̱ gras nir.
Rne̱e̱ de̱ nu dzi coz ily nac ru,
nunu rzat de̱ de coz ily nu bicy ru.
2 Orzeꞌ na Ñgyoozh:
“Ya̱ gzu̱ tub tiem nu gri be̱e̱ ni de mbecy.
Orzeꞌ ya̱ gri be̱e̱ ni dey gal mod nu rlagy ñi.
3 Bis la gash ñi dela mbecy nu dela bañcyug nu psaꞌ lagya̱.
Grib duru ub la gyishlombecy,
tees ya̱ zu ferta̱ zeꞌ nu nash cyong ñi.
4 Ya̱ ne̱e̱ lo de mbecy leꞌ nu cueꞌ griib zily dey ub yu.
Nunu ne̱e̱ lo de mbecy a̱ꞌ nap nu cueꞌ gyicy leꞌy.
5 Ne̱e̱ loy nu cueꞌ gyicy leꞌy.
Ne̱e̱ lo dey nu cueꞌ niiy nu riidz ñgya”,
nam.
6 Ñgyoozh,
biñ nu gri bee,
walab par zeꞌ nu driib doo güidz gruum ornu cyid mi.
Ni walab par zeꞌ nu rza doo güidz gruum nu cyid mi.
Ni walab par yaa been o par yaa reg na,
ornu güiin zeꞌ nu driib doo güidz,
walab de zeꞌ gruum nu cyid mi.
7 Tees mi zeꞌ gri beem ni de mbecy.
Yuꞌ dey gruu fals yu.
Yuꞌ gaꞌ dey gruu caacy yu.
8 Gun ndeꞌ nañ gal nu na nu Ñgyoozh bi zu yaam tub taz.
Zeꞌ ñup nu yuꞌ nañ taz zeꞌ,
ndeꞌ nu rzi lagy mi lo dey.
Orzeꞌ shum ñii gyishlombecy nu goꞌ de mbecy a̱ꞌ nap.
Orzeꞌ laazh la dey ñi nu goꞌy.
Ni se tub ndzu̱j wayiyeeñ.
9 Zeꞌ ya̱ rzata̱ Ñgyoozh ne̱,
biñ nu briib zily Jacob,
par tub la.
Dula̱ lom nu gyabica̱ gyel mbecy nim.
10 Mi zeꞌ shes saam de mbecy a̱ꞌ nap.
Zeꞌ de mbecy nap,
gyicy fert mi dey.