Mbecy rnii nuy Ñgyoozh nu locyuub mi de mbecy Israeel: tub riidz ni Asaf
74
Ñgyoozh, ¿lagu mneꞌr de̱ ya̱ par tub tir ziꞌl?¿Lagu bdzaꞌr ne̱ de̱ ya̱, mbecy nu nac shily nu rñar?
2 Bicy nu gyezaꞌ lagy ru de mbecy nu bzu chur nu gac nir nese tonaꞌ la gulas.
Ru bloor de̱ ya̱ yaa de mbecy ornu bicy niy de̱ ya̱ por fers la.
Bicy nu gyezaꞌ lagy ru bicy Sión, zeꞌ nu pcyiiñ ru gulas.
3 Da güiir de lugaar nu mnit lo ni ledz de̱.
De losaꞌ yu̱u̱ de̱ mnit loy dela coz ni yuꞌ yon nir.
4 De losaꞌ yu̱u̱ de̱ rbishti dey yuꞌy zeꞌ nu zub yuꞌ yon nir
nu bet lagy dey nu bicy yu gan.
Zeꞌ bzuub dey bander niy, par nu gabe nu bicy dey gan.
5 Rabee dey gal nu rabee de mbecy
ornu raꞌn dey gyish nu gyibag.
6 Blaꞌ dey de yala cyit na ni yuꞌ yon nir.
Blaꞌ dey ñi nu gyibag nu marti niy.
7 Ptiily dey yuꞌ yon nir gal lo yu la,
nunu pcaa dey gyiñ.
Bicy bag dey lugaar zeꞌ nu briib zily mbecy ru.
8 Orzeꞌ na dey nañ lardooy: “Tub tir ziꞌl mnit lon dey”, nay.
Pcaa dey gyi zañ lugaar yon ni ledz de̱,
de zeꞌ nu byatublaazh de̱ nu briib zilya̱ ru.
9 Blazh de muesht yon nu ricy ñi nu rabee nu ru nac nur de̱ ya̱.
Blazh de mbecy nu mnii por cuen nir Ñgyoozh.
Nunu ni tub la mbecy wagad lagy yu gul checa de coz deet nu rzac de̱ na.
10 Ñgyoozh, de losaꞌ yu̱u̱ de̱, ¿la be gaal tiem gyigy nu naañ dey ru?
¿A gnii zi dey nir par tub la?
11 ¿Lagu wangalagy ru nu locyuub ru de̱ ya̱?
¿Lagu pcyiid yaar, Ñgyoozh?
12 Zeꞌ ru guc ru rey ne̱ de̱ nese nu loga la.
Zañ tir bloo mbañ ru de̱ ya̱ ledza̱.
13 Ru blew ru nis.
Brir be nac gaañ seꞌñ nu fers nir.
Nunu blaꞌr too de bily fert nu rded lo nisyudoo.
14 Ma zeꞌ la ma Leviatan.
Tees ru blaꞌr too ma, Ñgyoozh.
Orzeꞌ briic ru cuerp ni ma nu gow de bañ gyish nu rcyiiñ de lugaar ub zi.
15 Ru bicy ru nu briib nis miꞌ,
nunu bicy ru nu briib nis ily.
Nunu bicy ru nu guwach gyoow ily.
16 Psaꞌ lagy ru dzi, nunu psaꞌ lagy ru rel.
Pcaar doo güidz seꞌñ, nunu pcaar beey seꞌ ma.
17 Ru bzur bzaa ni gyishlombecy.
Bzur tub tiem par lascyey, zeꞌ tuubaꞌ tiem par cuarez.
18 Ñgyoozh, bicy nu gyezaꞌ lagy ru nu de losaꞌ yuur rigy nu naañ dey ru.
De mbecy ton zeꞌ rgüii naañ dey lor.
19 De̱ ya̱ na de̱ gal na begy nir.
Cueꞌ zeeñ ru de̱ yaa de losaꞌ yu̱u̱, de mbecy nu dzi a̱ꞌ nap.
Cueꞌ nit lagy ru de mbecy shni nir.
20 Bicy nu gyezaꞌ lagy ru trat nu bicy nur de̱ ya̱.
Gun dela lugaar ni gyishlombecy, yuꞌ mbecy nu rcach loy
par nu shiñ gyicy nuy losaꞌy.
21 De yu nu rzac deet nu nac reñaꞌ mbecy,
cueꞌ gzaan ru nu gruu gyel mbecy niy.
De mbecy shni, nu de mbecy nu ricy falt de coz cyiiñ ni,
briic fers ni dey nu griib zily yu ru.
22 Ñgyoozh, cueꞌ gzu rir.
Briic nu gad lagy de losaꞌ yuur cyu nac ru.
Bicy nu gyezaꞌ lagy ru nu de mbecy ton re wacheca la dey nu rigy nuy ru.
23 Cueꞌ nit lagy ru de nu zu redz nu ricy de losaꞌ yuur nu nac nu rzi lagy dey.
Wacheca la de mbecy nu rzi lagy lor nu ricy dey nu zu redz.