Libro 3
Gyel gubier ni Ñgyoozh: tub riidz ni Asaf
73
Rishli nap ricy nu Ñgyoozh de mbecy Israeel,nunu nap ricy num de mbecy nu caacy lardoo.
2 Na la, ya̱ na gal nu na mbecy nu se ñuu miiñ ziꞌl ricy falt nu gyes saay.
Se ñuu miiñ ziꞌl ricy falt nu grily gyiꞌy.
3 Ya̱ bicy saap lagya̱ ornu bzaaca̱ de coz nu ricy de mbecy leꞌ,
gun dzi gusht rcyiiñ dey, nunu dzi a̱ꞌ nap dey.
4 Nunu rila wacsac zi dey.
Ya lagy nay, nunu rded ruub yu.
5 Wagyuꞌ zi cuerp ni dey gal nu ryuꞌ zi cuerp ni deꞌ zir mbecy.
A̱ꞌ zac deet dey gal nu rzac deꞌ zir mbecy.
6 Gyel leꞌ ni dey rabeeñ gal nu rabee bec nu ri yeñ yu.
Zeꞌ nu shiñ ricy dey, ndeꞌ nañ gal nu na shab yu nu rsoow ñi cuerp niy.
7 Bya shii la urlo dey nu tantaꞌ nu breꞌñ yu.
Se nu rboo ic ziꞌl dey de coz a̱ꞌ nap nu gyicy yu.
8 Rigy nu naañ dey mbecy.
Orzeꞌ ro dey riidz ni de coz a̱ꞌ nap nu gyicy yu.
Ricy leꞌ dey nunu rboo ic yu lac mod ted ziy mbecy.
9 Rnii dey riidz nu za contr ni Ñgyoozh, biñ nu zub gyibaa.
Zeꞌ gyishlombecy ii ñgya ricy dey
ornu ricy yu mandaar de mbecy.
10 Mas gal de mbecy ni Ñgyoozh rza dey lo de mbecy a̱ꞌ nap zeꞌ
par nu gyabic dey gyel mbecy niy.
Sac la falt ni de mbecy a̱ꞌ nap zeꞌ rzii dey.
11 Orzeꞌ i mod rnii de mbecy a̱ꞌ nap zeꞌ:
“¿Lac mod gad lagy Ñgyoozh, biñ nu gya zir zu?
Rila wac gad lagy mi”, na dey.
12 Ni mod na de mbecy a̱ꞌ nap zeꞌ.
Gusht rcyiiñ dey, nunu a̱ꞌ biigy ricy dey nu ryañ gyel nap niy.
13 Zeꞌ, ¿la cyiiñ ñi nu zaab ricy caacy la̱ nañ lardo̱o̱?
Nunu, ¿la pcyiiñ ñi nu wangyicya̱ de coz cyi?
14 Gun gua la dzi rzac zi̱.
De dzi la or napor, zaab ri̱ la̱ lo cashtig.
15 Tees ya̱ wagnii to̱o̱, gal nu rnii too de yu zeꞌ,
gun benu ni nii too,
orzeꞌ wagyicy pa̱a̱ nu de losa̱ꞌ, de yu nu nac mbecy ni ru, Ñgyoozh.
16 Ya̱ bicya̱ tub fers nu gyet laga̱ cuen de coz ii,
tees wangagye̱e̱ nu tantaꞌ biigy,
17 Gashtal ornu gua̱ nañ yuꞌ yon nir,
orzeꞌ bet laga̱ cuen la coz zac mbecy a̱ꞌ nap.
18 Ru zur dey tub lugaar nu tonaꞌ la cyudz,
gun orzeꞌ, zeꞌ grily gyiꞌ dey.
Orzeꞌ gyet lag yu gal lugaar nu nit loy.
19 Sij ziꞌl, orzeꞌ bi mnit lo dey.
Chay tub lugaar nu tonaꞌ la dzib yu.
Ndeꞌ zaꞌ loñ dey.
20 De yu re na dey gal nu na coz nu rguu pcaal.
Ornu rish na yaa, orzeꞌ rnit lo coz fals nu rniiñ.
Ornu shuub tub tiem, orzeꞌ ru nit lagy ru dey, Ñgyoozh.
21 Tiem nu guti bis nañ lardo̱o̱, tiem nu guc deet nañ shcab ne̱,
22 ya̱ guca̱ tub mbecy ton, o tub mbecy wagad lagy.
Par lo ru na̱ gal nu na tub bañgyish.
23 Mas ni, Ñgyoozh, tees dub laa tiem rcyiiña̱ gaab ga zeꞌ nu zu ru,
nunu ru nash ru ya̱a̱.
24 Ru blyuur ne̱ nu yap ca̱ ich ru.
Na despuees, orzeꞌ ru gyash ru ya̱ lat gyel lily nir.
25 ¿Cyu zu ne̱ gyibaa?
Tub zi la ru, Ñgyoozh.
Ndeꞌ nu walagya̱ ni tub la coz nu yuꞌ gyishlombecy ii,
gun bi ricy cupa̱ ru.
26 Mas gyagyidz cuerp ne̱ nunu lazh baloor nañ lardo̱o̱,
tees ru, Ñgyoozh, cuic ru fers ne̱.
Rila walagya̱ reñaꞌ coz, sinu ru ziꞌl, Ñgyoozh.
27 Gun waded la nit lo de mbecy nu ricy zet lagy lor.
De mbecy nu wagyicy paa mandaar nir, nit lo dey.
28 Zeꞌ ya̱, ¡dzi ga nap nu zu̱ gaab ga zeꞌ nu zu ru, Ñgyoozh!
Ru, wazaan ru nu zaca̱ ni tub la coz a̱ꞌ nap.
Ya̱ ne̱e̱ lo de mbecy dela coz ily nu bicy ru.