Solomoong rnii nuy Ñgyoozh nu locyuub mi yu
72
Ñgyoozh, blyuu ne̱ nu gyicya̱ gyel fushtizgal mod nu ru ricy ru,
nunu gri be̱e̱ tub mod nap,
gun ya̱ naca̱ rey ni de mbecy nir.
2 Ya̱ gyicya̱ gyel fushtiz ne̱ gal mod nu rlagy ñi nu de mbecy ni ru.
Nu mod nap gyub ica̱ de mbecy nu rzac deet.
3 Ya̱ diña̱ lor nu de logyiꞌ cuic ñi sheñ cosech
nu nac nu de mbecy nir nap ricy dey.
4 Nunu diña̱ lor nu cha̱ faboor ni de mbecy zi,
nunu locyuuba̱ de mbecy nu ricy falt coz nu cyiiñ ni,
tees nit lo̱ de mbecy nu rboo coz ni dey.
5 Ya̱ diña̱ nu dzib lagya̱ lor, Ñgyoozh,
dub laa lat nu ca ba ni doo güidz,
gal nu dub laa lat nu rbic beey yaa ni ma,
par dub laa tiem nu yad par lo.
6 Diña̱ lor nu gaca̱ gal nu na gyey nu yet lat ya mni,
o gal nu na gup nu yet lo yu.
7 Diña̱ lor nu dub laa lat nu cyiiña̱ gyishlombecy ii,
dela coz gac ñii mod nu nap,
nunu diña̱ lor nu gad de coz nu cyiiñ dub laa lat nu ca yaa ni beey.
8 Diña̱ lor nu gyub ica̱ dela yu nu ri gazel cyup nac nisyudoo,
nese gal gyoow Eufrates dela yu zeꞌ nash ñii gashtal zeꞌ nu rza doo güidz.
9 Orzeꞌ de mbecy nu rcyiiñ de lugaar ub zi zu tib dey lo̱.
De losaꞌ yu̱u̱ gyes saa dey lo yu.
10 De rey ni Tarsis, gal nu de rey nu rcyiiñ lo yu nu ri gazel nisyudoo
cyish dey ne̱ gyiꞌ de coz niy.
Orzeꞌ gabe nu nac dey moz ne̱.
Se rey ni Sabá nu Seba cyid nu dey tiñ nu cuic yu ne̱.
11 Dela rey zu tib dey lo̱,
nunu gzu dey altant nu naca̱.
12 Gun ya̱ loo napa̱ de mbecy zi benu nii nuy ya̱.
Nunu locyuuba̱ de mbecy nu ricy falt coz nu cyiiñ ni
gal nu de mbecy nu sac cyu locyuub.
13 Gashni lagya̱ de mbecy shni gal nu de mbecy nu ricy falt coz ni.
Loo mbaña̱ de yu zeꞌ.
14 Ya̱ lo̱o̱ dey yaa de mbecy shiñ ricy nu yaa de mbecy nu ricy ras,
gun par ya̱ tonaꞌ la coz ily nu cueꞌ gat dey.
15 Ya̱ diña̱ lor nu tuñ cyiiña̱ gyishlombecy.
Diña̱ lor nu gad de or ni Sabá ne̱.
Diña̱ lor nu dub laa tiem nii nu mbecy ru nu nac ya̱,
nunu ru nap gyicy nur ya̱ par dub laa tiem.
16 Ya̱ diña̱ lor nu chuꞌ sheñ uub ledza̱.
Diña̱ lor nu gyow la lo yu nu nac de ya mni gal nu na de ya mni ni Libano.
Diña̱ lor nu dutuub la lat de gyedz nicy la chuꞌ mbecy.
Zigy dey gyac yu gal nu mbat la zeti gyizh nu nash lo yu.
17 Rila cueꞌ zaan ru nu nit lagy de mbecy nu la̱.
Bicy nu gad lagy de mbecy nu dzi lily na̱ dub laa lat nu ca doo güidz baa.
Dela lugaar ni gyishlombecy nii de mbecy nu nap ricy nur dey, gal mod nu ricy nur ya̱.
18 Orzeꞌ gyabic na gyel mbecy ni Ñgyoozh Shuaan den, biñ nu riib ic Israeel.
Tub zi lam ricy mi coz nu cha du ic na.
19 Griib zily den mi par dub laa tiem.
Gzu laa gyel lily nim dutuub la gyishlombecy.
¡Ni gac ñii!
¡Ni gac ñii!
20 Lat de riidz ii yuꞌ coz nu bdiiñ Dabi lo Ñgyoozh.
Dabi iꞌñ Isai.
Byaꞌ loñ.