Tub yu bel rnii nuy Ñgyoozh
71
Ñgyoozh, ya̱ yapa̱ lor nu cuic ru lugaar nu laa lagya̱.Orzeꞌ cueꞌ zaan ru nu gyicy mbecy gan ya̱.
2 Bloo nap ya̱ nunu blocyuuba̱
nu nac nu ru dub laa tiem ricy ru coz nu seꞌñ.
Bzuub gyidag ne̱ nunu bloo mbaña̱.
3 Bicy nu gac ru gal nu na tub gyitaꞌ nu cha̱ laa lagya̱.
Bicy nu gac ru gal nu na tub yuꞌ fert, zeꞌ nu cach lo̱ lo de losaꞌ yu̱u̱.
Gun par ya̱ ru nar gal na gyitaꞌ zeꞌ.
Par ya̱ ru nar gal na yuꞌ fert zeꞌ.
4 Ñgyoozh ne̱, bicy nu gruu napa̱ yaa de mbecy a̱ꞌ nap.
De mbecy dañ nu de mbecy gurfeñ, cueꞌ zaan ru
nu gyicy nu dey ya̱ ca na la coz nu rlagy yu.
5 Ñgyoozh, Shuaan na, lo ru drish lo̱.
Ya̱ ricy cupa̱ consuel lor nese miiñ la̱.
6 Nese lat nu ri̱ nañ ñaꞌ ne̱, bi brish lo̱ lor.
Nunu mñar ya̱ gashtal pshuub la dzi nu gula̱.
Na gyabica̱ gyel mbecy nir par dub laa tiem.
7 De coz nu rzaca̱ ricy ñi coz nu rza nu ic de mbecy,
gun orzeꞌ gad lagy dey nu ru nac ru lugaar fert nu cha̱ laa lagya̱.
8 Gua la dzi ya̱ byabica̱ gyel mbecy nir,
nunu rne̱e̱ nu dzi zily nac ru.
9 Na nu dzi bi guusha̱, cueꞌ co chur ya̱.
Na nu blazh fers ne̱, cueꞌ zaan ru ya̱.
10 De losaꞌ yu̱u̱ rsaap dey riidz nu shiñ gyicy nuy ya̱.
Ro dey riidz nu rboo ic yu lac gyicy nuy ya̱.
11 “Mnit lagy Ñgyoozh yu”, rnii dey.
“Na gyan gzab na ich yu.
Orzeꞌ dub nay.
Sac la cyu nu co nap yu”, rniiy.
12 Ñgyoozh, cueꞌ dzi zet gzur lo̱.
Dzach ru da güiir ya̱.
13 Dzi ga nap benu gruu gyel mbecy ni de yu nu driib cyi fals to̱o̱.
Nap benu nit lo dey.
Dzi ga nap benu nii zi de mbecy ni dey, de yu nu rlagy ted zi ya̱.
Nap benu gyac dey mbecy duneꞌ.
14 Zeꞌ ya̱, dub laa tiem drish lo̱ lo ru, Ñgyoozh.
Nunu tub dzi ga dzi zir driib zilya̱ ru.
15 Ya̱ rne̱e̱ nu dzi nap ru.
Gua la dzi rne̱e̱ nu lac mod bloo mbañ ru de̱ ya̱.
Ni wacaꞌ gyet laga̱ cuen nu tantaꞌ coz zañ.
16 Ya̱ rdeda̱ nu fers nu rbic ru ne̱, Ñgyoozh.
Ya̱ driib zilya̱ ru gyiꞌ nu ricy ru de coz mod nu seꞌñ.
Tub zi la ru ricy ru coz nu seꞌñ.
17 Ñgyoozh, ru blyuur ne̱ nese nu bzu̱ gyel feñ,
nunu mas gal dzi na gabee rzata̱ de coz ily nu ricy ru.
18 Zeꞌ na nu dzi guusha̱,
nunu ptop to̱o̱, ru cueꞌ nit lagy ru ya̱.
Gac nur ya̱ lat nu gabee rne̱e̱ nu dzi nap ru,
nunu ne̱e̱ lo de mbecy nu yuꞌ tiem na nu lo de yu nu ruu zac par lo,
nu ru dzi fert ru.
19 Par nu tonaꞌ la coz ily de coz nap nu ricy ru,
ndeꞌ nañ gal nu na tub coz nu shuub ñi gal gyibaa.
Tonaꞌ la coz ily ricy ru.
Sac ni tub la cyu nu saap ru.
20 Ru bicy ru nu tonaꞌ la bzac deeta̱ nunu tonaꞌ la bzac zi̱.
Tees rbic ru fers ne̱, nunu wansaan ru nu ñgyata̱.
21 Na gyicy ru nu gyalily zir na̱,
nunu cuic ru baloor ne̱.
22 Niꞌ ziꞌl driib zilya̱ ru, ornu rsheta̱ lo beeñ arpa.
Griib zilya̱ ru, Ñgyoozh ne̱,
gun ru ricy paar.
Nu beeñ arpa ne̱ gyicya̱ di lor,
nunu dula̱ lo ru, biñ yon ni de mbecy Israeel.
23 Lat nu ricya̱ di lor, orzeꞌ grishti̱ nu yet lagya̱.
Rdula̱ nu dutuub la lardo̱o̱,
gun ru bloo mbañ ru ya̱.
24 Gua la dzi rne̱e̱ nu dzi nap ru,
gun bicy ru nu bruu gyel mbecy ni de yu nu rlagy ted zi ya̱.