Dabi rnii nuy Ñgyoozh nu locyuub mi yu
69
Ñgyoozh bloo mbañ ya̱.Na rzaca̱ gal nu rzac mbecy ornu bi ca nis gal yeñ yu.
2 Bi wes ti̱ lo gudz.
Sac la yu cyigy nu zuub gyiꞌ.
Na bet laga̱ gyel.
Guti̱ gal zeꞌ nu gyi zir niñ.
Nis yu bi za nuñ ya̱.
3 Blazh la fers ne̱ nu tonaꞌ la brishti̱ du̱ mbecy nu cyid güiiy ya̱.
Na rac gyeryeña̱.
Na bi bda urlo̱ nu tuuñ tiem pcaa lo̱ nez nu cyid güiir ya̱, Ñgyoozh.
4 Tonaꞌ la yuꞌ de mbecy nu rzi lagy lo̱,
mas se la la coz bicya̱ nu ni gyicy nu dey ya̱.
Zañ zir dey gazeꞌ de gyich nu taꞌ to̱o̱.
Dzi fert de losaꞌ yu̱u̱,
nunu rlagy dey cut yu ya̱.
Ornu rzat dey ya̱, orzeꞌ rguu dey.
Na, ¿a rlagy ñi nu gyabica̱ coz nu wangyicy gubaana̱ ni dey?
5 Ñgyoozh, ru rad lagy ru nu ya̱ dzi ton na̱.
Ya̱ walab nu rcacha̱ de cyi nu bicya̱ lo ru.
6 Ñgyoozh biñ nu riib ic nu blaazhaꞌ la soldad zigy, cueꞌ zaan ru
nu gyicya̱ nu gruu gyel mbecy ni de mbecy nu ricy cup consuel lor.
Ñgyoozh biñ nu driib zily de mbecy Israeel, cueꞌ zaan ru
nu gyicya̱ nu nii zi mbecy ni de mbecy nu driib zily ru.
7 Ñgyoozh, nu nac ru mnii zi de mbecy ne̱.
Nu nac ru byambat la gyid lo̱ nu gut lo̱.
8 Par de losa̱ꞌ, byaca̱ gal nu na mbecy yad.
Zeꞌ par de bicya̱ byaca̱ gal nu na mbecy a̱ꞌ yuꞌ lo dey.
9 Gun ya̱ tonaꞌ la rca̱ yuꞌ yon nir.
Wacyuu ica̱.
Ornu rnii zi mbecy ni ru
orzeꞌ ya̱ ratow ne̱.
10 Bicy gyidza̱ uba̱
ornu pca̱ ni uba̱ nu cueꞌ da̱w gyit.
Orzeꞌ mnii zi de mbecy ne̱.
11 Ornu bzu̱ shab cuiña̱ par nu gabe nu ricya̱ sentiir,
orzeꞌ rigy nu naañ dey ya̱.
12 De yu nu rded lat cay mnii dey rishcuen nu nac ya̱.
De mbecy rzugy rulruꞌ dey de coz nu mniiy ne̱.
13 Zeꞌ ya̱, rne̱e̱ du̱ ru, Ñgyoozh, Shuaan na̱.
Zaꞌ lor de coz nu mne̱e̱ lor tiem nu ru zur.
Orzeꞌ gyicy yac ru nu de riidz nu mniir
ornu mniir nu co mbañ ru de̱ ya̱.
Gun tonaꞌ la nu rcar de̱.
14 Orzeꞌ bloo mbañ ya̱ lo gudz nu wes ti̱.
Bicy nu gruu napa̱ nu nac de losaꞌ yu̱u̱,
nunu bloo nap ya̱
ornu gyet laga̱ gal zeꞌ nu gyi ni nis.
15 Ñgyoozh, cueꞌ zaan ru cuish nis yu to̱o̱.
Cueꞌ zaan ru nu gata̱ zeꞌ nu gyi ni gyel.
Cueꞌ zaan ru nu gyet laga̱ zeꞌ nu yuꞌ mbecy gut.
16 Ñgyoozh, ru bzaꞌ lo de coz nu mne̱e̱ lor
nu nac nu dzi rcar ya̱.
Bish cya bgüii lo̱ nu nac nu rashni lagy ru ya̱.
17 Cueꞌ lyuu ich ru lo̱,
gun ya̱ tub mbecy nu rzu bich nu nac ru.
Na tonaꞌ la deet rzaca̱.
Na na la da nu zaꞌ lor de coz nu rzaca̱.
18 Gal lo̱ la̱ da Ñgyoozh.
Bicy nu gruu napa̱.
Bloo ya̱ yaa de losaꞌ yu̱u̱.
19 Ru nap rad lagy ru nu rnii zi mbecy ne̱.
Rad lagy ru nu bruu gyel mbecy ne̱,
nunu waca lagy de mbecy lo̱.
Nap yu lor dela losaꞌ yu̱u̱.
20 Blazh la baloor ne̱
nu nac de riidz nu dzi zi za nu rnii de mbecy.
Ya̱ mnii to̱o̱ nu ñgyashni lagy mbecy ya̱,
tees wangashni lagy dey ya̱.
Wangyapa̱ ni tub mbecy nu mbic consuel ne̱.
21 Ornu byana̱ gyit,
orzeꞌ briic dey benen nu da̱w.
Ornu mnii to̱o̱ nu do̱ꞌ nis,
orzeꞌ briic dey nis lya do̱ꞌ.
22 Ornu row dey gyit nañ yuꞌ yon nir,
orzeꞌ yet lag dey nañ caa.
Yac dey gal na bañcyug nu guti nañ caa
gyiꞌ nu row dey beel nu gua gun lo ru Ñgyoozh.
23 Dzi ga nap benu gyicy ru nu gyac dey mbecy lo caꞌ.
Nunu bicy nu gash bis gyiꞌ dey.
24 Ru briic cashtig ni dey
nu nac nu rzi lagy ru loy.
Nu nac nu rzi lagy ru lo dey,
orzeꞌ bzaab ich dey gal gad lay.
25 Dzi ga nap benu lugaar zeꞌ nu yeche dey gyiyeeñ ub ziñ.
Dzi ga nap benu waruu mbañ ni tub mbecy nu rcyiiñ nañ yuꞌ negy ni dey.
26 Ni bicy nu dey, Ñgyoozh,
gun de yu re pshet zi dey de mbecy nu ru briic ru cashtig ni,
de mbecy nu bicy ru nu bzac zi.
Yet lagy dey rzat ziy de mbecy zeꞌ.
27 Ru briib cuen dela cyi nu bicy dey.
Cueꞌ zaan ru nu ded ligaañ ni dey.
28 Dzi ga nap benu cyib ru nu la dey lo libr nu taꞌ nu la de mbecy mbañ.
Dzi ga nap benu sac nu la dey lo lisht ni de mbecy nir.
29 Zeꞌ ya̱, dzi ga deet rzaca̱.
Tees ru co mbañ ru ya̱.
Orzeꞌ shup ru ya̱ zeꞌ nu sac coz rishdzidz.
30 Ya̱ dula̱ nu gyabica̱ gyel mbecy nir, Ñgyoozh.
Ne̱e̱ nu dzi zily nac ru, nunu grica̱ gras nir.
31 Gyet zir lagy ru benu ni gyicya̱
gazeꞌ nu grica̱ chigud nu gac ma gun lor.
Gyet zir lagy ru benu ni gyicya̱, Ñgyoozh,
gazeꞌ nu grica̱ tub tor nu bi bzoꞌw nguaz nu gac ma gun lor.
32 De mbecy nu rzac zi, ornu rzac dey nu rboo mbañ ru ya̱, orzeꞌ yet lagy dey.
De mbecy nu driib zily ru, Ñgyoozh, orzeꞌ rad baloor ni dey.
33 Ñgyoozh rzuub gyidag mi ni de mbecy
ornu ricy falt coz nu cyiiñ ni dey,
nunu wagnit lagy mi de mbecy nim nu yuꞌ nañ yuꞌ gyiib.
34 Orzeꞌ de ru mbecy nu de ru bañcyug nu yuꞌ gyibaa, gal nu gyishlombecy, nu nisyudoo,
byabic der gyel mbecy ni Ñgyoozh.
35 Mi zeꞌ co mbañ mi mbecy Sión.
Orzeꞌ gyicy cup mi de gyedz nu yuꞌ Juda.
Orzeꞌ lugaar zeꞌ cyiiñ de mbecy nim, nunu gyash yaa dey ñi.
36 Orzeꞌ de lugaar zeꞌ gyac ñi gyaꞌn nu gyiyeeñ yaa de iꞌñ dey nu gruu zac par lo.
Ndeꞌ lugaar nu cyiiñ de mbecy nu rca lagy lom.