Dabi rul yu nu nac nu bicy mbecy Israeel gan lat gyel yuu
68
Lat nu rac la coz, ornu Ñgyoozh rzuꞌm lat zeꞌ,orzeꞌ rtush las mi de losaꞌ yuum.
De mbecy nu rzi lagy lom
driib dze dey rash yu carer druu chuy lom.
2 Gal nu ricy bi nu rneꞌñ dzeeñ,
ni rnit dey ornu rcyuu num yu.
Gal nu yanis za gyergyiñ ornu zub ñi lo boo,
ni mod rnit lo de mbecy a̱ꞌ nap par lom.
3 Zeꞌ de mbecy nu nac nim yet lagy dey.
Ricy dey saꞌ lom.
Zu cyit lagy dey,
nunu rbish ti dey nu tantaꞌ yet lagy yu.
4 Biily der lo Ñgyoozh.
Byabic der gyel mbecy nim lat nu rul ru lom.
Pshes nañ der tub cant lom,
gun mi zeꞌ biñ nu rded lat za baa.
Mi zeꞌ lam Ñgyoozh, Shuaan den.
Orzeꞌ gucyit lagy der lom.
5 Ñgyoozh, mi zeꞌ zum nañ yuꞌ yon nim.
Mi zeꞌ rgüiim de yu nguzh zi,
nunu zaab ic mi de biñ mñaa byud.
6 De mbecy, benu sac zeꞌ nu cyiiñ yu,
orzeꞌ rbic mi tub lugaar nu cyiiñ yu.
Nunu ricy mi nu dub gusht la gruu de pres.
Zeꞌ de mbecy nu za contr nim,
de yu zeꞌ ricy mi nu rcyiiñ dey lo yu wach nu byecy.
7 Ñgyoozh, tiem nu blyuur nez ni de mbecy nir,
tiem nu gusa nur dey de ngush wach,
8 orzeꞌ briib duru lo ru, biñ nu bruu zac too Bicy Sinai.
Ru biñ nu nac Ñgyoozh ni de mbecy Israeel.
Bet gyey lor nu bruuñ gal baa.
9 Ñgyoozh, ru bicy ru nu bet gyel la gyey,
nunu bicy ru nu byanap de yu nu byecy lo.
10 De mbecy nir guchuꞌ dey lugaar zeꞌ.
Orzeꞌ ru briic ru de coz cyiiñ ni de mbecy zi, gun ru dzi nap ru.
11 Ñgyoozh bicy mi mandaar lo zigy de biñ mñaa nu cha nu dem raso̱o̱.
12 Orzeꞌ “de rey, nu de soldad nim, bi rash dem carer yam”, na de biñ mñaa zeꞌ.
De biñ mñaa nu byeeñ yuꞌ rlew dem de coz nu bloo dey ni de losaꞌ yuuy.
13 Yuꞌ coz nu na gal nu na begy, nunu briily dey plat ich ma.
Zeꞌ loweꞌ ma briily dey or caꞌ.
(De ru, yu gyeey,
¿lagu byeeñ la be der nañ chicyer ni shily ni der dzi ni gyel yuu?)
14 Ñgyoozh, biñ nu gac gyicy dela coz, ptush las mi de rey too bicy Salmón.
Orzeꞌ bicy mi nu bet gyey rag.
15 Dzi ga gya de logyiꞌ ni Basan.
Zañ too bicy ricy cup ñi.
16 De mbecy nu driib zily ñgyoozh nab ni logyiꞌ ni Basan,
¿lagu rasaap lagy dey
gyiꞌ nu driib zily de mbecy ub la Ñgyoozh too bicy nu pcuim par ub mi?
17 Ornu Ñgyoozh bruum Bicy Sinai par nu yam lugaar yon nim,
orzeꞌ ya num bee miily de caret fert ni gyel yuu.
18 Za num zigy pres nu bdub mi lat gyel yuu,
ornu gup mi too bicy nim.
Zeꞌ rcyiiñ mi.
Orzeꞌ zigy de mbecy nu za contr nim, zeꞌ rgyish dey nim.
19 Gyabic den gyel mbecy ni Ñgyoozh Shuaan na,
gun mi zeꞌ de dzi la nuum suu den.
Mi zeꞌ nac mi biñ nu rboo mbañ de ub na.
20 Ñgyoozh ni de ub na, nac mi tub Ñgyoozh nu rboo mbañ de mbecy.
Mi zeꞌ Shuaan den, biñ nu ricy cup mod nu cueꞌ gat na.
21 Zeꞌ de mbecy nu nac losaꞌ yuum, de yu zeꞌ rlaꞌm too dey.
Ni gyicy num de mbecy nu zaab ricy la de coz cyi.
22 Ñgyoozh nam: “Ya̱ lo̱o̱ de losaꞌ yuur logyiꞌ Basan nu yap du̱ dey lor tuubaꞌ tir.
Mas gashtal iiñ nisyudoo lo̱o̱ dey, orzeꞌ yap du̱ yu,
23 gun orzeꞌ gac neꞌ gyiꞌ der lat reñ dey.
Orzeꞌ gzar looñ.
Orzeꞌ de che̱ꞌ ni der goꞌ ma reñ zeꞌ gal gyel la ni ma.”
24 Ñgyoozh, dela mbecy bzaac dey,
ornu bruur nez nu nac nu bicy ru gan.
Ñgyoozh, biñ nu nac rey ne̱, bruur nez
ornu yar gal lugaar yon nir.
25 De yu nu biily bzub lo dey lor.
Zeꞌ de musiic, par ich ru bzab dey.
Zeꞌ gazel za de fiñ feñ nu rshet deñ lo gyid.
26 Orzeꞌ biily dey: “Dela de ru mbecy zigy, byabic der gyel mbecy ni Ñgyoozh.
Dela de ru mbecy nu bruu lat nez Jacob,
byabic der gyel mbecy ni Ñgyoozh, Shuaan den”, biily dey.
27 Orzeꞌ nu loga la byeed de mbecy nu nac nez Benjamiing, yu nu nac mdoo blazh.
I zi ziꞌl dey byeed yu gazeꞌ deꞌ zir de nez mbecy Israeel.
Niga byeed de yu nu riib ic lat de nez mbecy Juda, nu dela mbecy ni dey.
Niꞌ ziꞌl byeed de yu nu riib ic lat de mbecy nez Zabulón gal nu de nez Neftali.
28 Ñgyoozh bicy nu gabe de gyel lily nir nu dzi rcyiiñ ru
nu gyicy ru de coz ily gal nu bicy ru nur de̱ ya̱ gulas.
29 Bicy nu rabee gal zeꞌ nu zub yuꞌ yon nir Jerusaleeng,
lugaar zeꞌ nu rza nu de rey de coz cyit na nu rbic dey nir.
30 Pshuu nu de mbecy Egipto,
de yu nu na gal na bañ show nu rcyiiñ lat gyizh caꞌ.
Pshuu nu de yu nu na gal nu na de chigud dañ nu bicer ni ma,
de mbecy nu rboo gyel mbecy ni losaꞌ nu nac nu tantaꞌ rzac dey lo tiñ.
Ptush las de mbecy nu gusht ni gyel yuu.
31 De mbecy nu nii por cuen ni fushtiz ni dey, gruuy Egipto nu cyid yu.
De mbecy Etiopia shes nañ dey yaay nu nii nuy Ñgyoozh.
32 De ru mbecy nu gruu zañ lugaar ni gyishlombecy,
biily der lo Ñgyoozh, biñ nu nac Shuaan na.
Byabic der gyel mbecy nim.
33 Mi zeꞌ rded mi gashtal baa nese nu bzub gyiꞌ gyishlombecy.
Bzuub gyidag der ornu ye rniim.
34 Mnii der nu Ñgyoozh dzi fert mi.
Mi zeꞌ riib ic mi de mbecy Israeel.
De coz nu rac baa, ndeꞌ ricy ñi nu rabee nu rac ricy mi de coz ily.
35 Rii la rac ich den lat nu zu Ñgyoozh nañ yuꞌ yon nim.
Mi zeꞌ Ñgyoozh ni de mbecy Israeel.
Mi zeꞌ rbic mi fers ni de mbecy nim,
nunu ricy mi nu cyiiñ dey nu gyicy yu coz ily.
¡Gyabic den gyel mbecy ni Ñgyoozh!