Dzi coz ily riiñ ricy Ñgyoozh: tub riidz ni Dabi
66
De ru mbecy nu yuꞌ gyishlombecy, biily der cant lo Ñgyoozhnu tantaꞌ zu cyit lagy der.
2 Biily der lom nu tantaꞌ coz ily nac mi.
Briib zily der mi.
3 Mnii der lom: “Rdzib lagy de̱ lor nu nac de coz ily nu ricy ru.
De losaꞌ yuur rash la bis dey
nu tonaꞌ la rdzib yu nu nac nu dzi fert ru.
4 Dela mbecy nu yuꞌ gyishlombecy griib zily dey ru, Ñgyoozh.
Gul dey lor.
Gul dey nu dzi zily nac ru.”
De ndeꞌ nii dey.
5 Da der, gun do den riidz nu nac de coz nu bicy Ñgyoozh.
Dzib lagy na nu nac de coz ily nu bicy mi lat de mbecy.
6 Mi zeꞌ bicy mi nu byac cyup laꞌ Nisyudoo Ña.
Orzeꞌ guti yu wach gazel.
De gyitoo bel ni den bded yu Gyoow Jordaang nu gyiꞌy.
Orzeꞌ gyet lagy den nu nac de coz nu bicy mi.
7 Mi zeꞌ gyub ic mi par tubla nu nac nu dzi fert mi.
Nunu rñam de lo la mbecy nu walab nim,
gun orzeꞌ cueꞌ cush cya de mbecy rnid ruꞌ ich mi.
8 De ru mbecy nu walab losa̱ꞌ, byabic der gyel mbecy ni Ñgyoozh ne̱ de̱.
Bicy der nu gyeñ de mbecy ornu gyabic der gyel mbecy nim.
9 Gun mi zeꞌ ricy mi nu mbañ den,
nunu wazaan mi nu ruꞌña gyel zi lon.
10 Ñgyoozh ru bicy ru preb de̱ ya̱.
Gal nu ricy mbecy ornu ricy caacy yu plat,
orzeꞌ rzeed dey ñi nu chañ lo lyudz gyi.
Ni bicy nur de̱ ya̱.
11 Bicy ru nu bet lag de̱ nañ caa nu bzu de losaꞌ yu̱u̱.
Bicy ru nu bdu̱ de̱ yuu ye nu icha̱.
12 Bzaan ru nu de losaꞌ yu̱u̱, de yu nu nac gur mbecy la,
bzuub gyiꞌy to̱o̱ de̱.
Bicy ru nu bzac de̱ gal nu rzac de mbecy nu rded lo gyi,
gal nu rzac mbecy nu rded lo nis yu.
Tees na rded nur de̱ ya̱ tub lugaar a̱ꞌ rishdzidz.
13 Ndeꞌ nu na yapa̱ nañ yuꞌ yon nir, Ñgyoozh,
nu zaaya̱ bañcyug nu gac ma gun lor.
Gyicy yaca̱ gal nu mne̱e̱ nu gyicya̱.
14 Tiem nu ya̱ bzac deeta̱, orzeꞌ pcab ru̱ꞌ nu grica̱ gun lor.
Na rica̱ coz nu bi mne̱e̱.
15 Grica̱ shily nu zaaya̱ ma lo cuug nir.
Ya̱ rica̱ tor nu chiib nu gac ma gun lor.
Orzeꞌ gyes nañ de dzeeñ ni ma.
16 De ru, mbecy nu rdzib lagy lo Ñgyoozh, da.
Orzeꞌ zuub gyidag ru.
Orzeꞌ ya̱ ne̱e̱ lor de coz nu bicy num ya̱.
17 Ye la brish ti̱ du̱m.
Orzeꞌ tonaꞌ la byabica̱ gyel mbecy nim.
18 Benu cueꞌ ñgyicy cuena̱ de cyi nu yuꞌ nañ lardo̱o̱,
orzeꞌ Ñgyoozh wazuub gyidag mi ne̱.
19 Rishli Ñgyoozh bzuub gyidag mi ne̱.
Orzeꞌ bicy mi gal nu mne̱e̱ lom.
20 Ya̱ lo lam gyabica̱ gyel mbecy nim,
gun waniim “Wac”, nu nac de riidz nu mne̱e̱ lom,
nunu wachecam nu rcam ya̱.