Yad ñi nu gyabic den gyel mbecy ni Ñgyoozh: Tub riidz ni Dabi
65
De mbecy Sión rlagy ñi nu gyabic dey gyel mbecy nir, Ñgyoozh,nunu gyicy yac dey dub gal na coz nu mniiy nu gyicy yu lor.
2 Gun ru nac ru biñ nu nap rad lagy ornu rnishbaa mbecy lor.
De mbecy nu gruu dela lugaar cha dey nañ yuꞌ yon nir
nu cuic dey bañcyug nu gac ma gun lor.
3 nu nac de cyi nu bicy dey.
Na ornu wagagyee ga̱ꞌ de̱ nu nac de coz shiñ na nu bicya̱,
orzeꞌ ricy sulagy ru ne̱ de̱.
4 Dzi ni de mbecy nu bzu chur nu gyac nir, de yu nu zu la roꞌ wedz nir.
“Dzi ga nap”, rnii to̱o̱ de̱
nu nac de coz nu druu nañ yuꞌ nir,
de coz nap nu ricy nur de̱ ya̱ nese nañ yuꞌ nir.
5 Ru reñ ru ornu rne̱e̱ du̱ de̱ ru,
nunu rlocyuub ru de̱ ya̱ ornu ricy ru nu rdzib de mbecy lo̱.
Coz ily ricy ru ornu rboo mbañ ru de̱ ya̱.
Dela mbecy nu druu de scyiñ ni gyishlombecy,
gashtal de mbecy nu druu tub laꞌ gaꞌ ruꞌ nisyudoo,
gyicy cup dey consuel lo ru, Ñgyoozh.
6 Nu nac nu dzi fert ru, orzeꞌ bzuub ru de bicy lugaar niñ.
Orzeꞌ rabee nu dzi cyiiñ ru gyicy ru de coz ily.
7 Ru ricy ru nu checa de nu zu redz nu ricy nisyudoo.
Ricy ru nu cheti ri de nu zu redz nu ricy de nguuly nu rded loñ.
Ru ricy ru nu checa de nu zu redz nu ricy de mbecy.
8 Orzeꞌ dela mbecy nu yuꞌ gyishlombecy tonaꞌ la cha nu ic dey
nu nac dela de coz ily nu ricy ru.
Orzeꞌ de mbecy cush ti dey nu nac nu gyet lagy yu
nu nac de coz nu ricy ru gashtal zeꞌ nu driib doo güidz,
nu gashtal zeꞌ nu rza doo güidz.
9 Rabee nu nap ricy nur de yu,
gun rshet ru gyey nu gyanap ñi.
De gyoow dza laañ nu yuꞌ nis nir,
gun orzeꞌ de yu, grib ya mni loñ.
Ndeꞌ mod nu ru rzu lily ru yu.
10 Ru rshet ru gyey lo de yu nu bi bdulaꞌ.
Orzeꞌ rza yoꞌñ, nunu yachi̱ñ.
Orzeꞌ ricy ñi nu driib de coz mni.
11 Orzeꞌ tonaꞌ la sheñ cosech rdudeꞌ
nu nac nu ru dzi nap ru.
Ca ziꞌl lugaar nu char yuꞌ sheñ cosech.
12 Tonaꞌ la caꞌ zu de ngush.
De too bicy rzac ñi gal nu rzac mbecy nu zu cyit lagy.
13 De zeꞌ nu lacy, dutuub la loñ yuꞌ shily.
De yu nu ri cuit de gyerlas ily, dutuub la loñ nash trig.
Delañ rzac ñi gal nu rzac de mbecy
ornu rbishtiy nu dzi yet lagy yu,
o nu rul yu nu nac nu dzi zu cyit lagy yu.