Dabi rnii nuy Ñgyoozh nu zaab ic mi yu
64
Ñgyoozh bzuub gyidag ne̱ ornu rzata̱ de coz deet nu rzaca̱ lor.Ya̱ rdziba̱ lo de losaꞌ yu̱u̱.
Bloo mbañ ya̱ yaa dey.
2 Bzaab ic ya̱, nu nac de coz a̱ꞌ nap nu rboo ic dey nu gyicy nuy ya̱,
gal nu lo de mbecy zigy nu shiñ ricy zeꞌ.
3 Ricy nu dey lyudz yu
gal nu ricy nu mbecy mandzicy ornu rzub yuñ lo gyitaꞌ.
Rzeed dey riidz a̱ꞌ nap niy rzañ lo bi,
gal nu rzeed mbecy gyech ni guaz nu rzañ lo bi.
4 Zeꞌ ngach yuꞌ dey nu rzeed yu gyech ni guaz lo mbecy nu sac falt ni.
Sij ziꞌl rzeed dey gyech zeꞌ.
Nunu rila wachib dey lo mbecy.
5 Ornu shiñ ricy dey, orzeꞌ rbic dey consuel ni losaꞌy.
Ro dey riidz nu losaꞌy ben ca ngach zir par nu zu dey caa.
Orzeꞌ rnii dey: “Se cyu la zac de ub na”, rniiy.
6 Rboo ic dey mod shiñ na nu gyicy yu.
Na orzeꞌ rnii dey: “Tonaꞌ la nap bloo ic na”, rniiy.
Se cyu la rad lagy la na coz nu yuꞌ nañ lardoo mbecy nunu la na coz nu rnii tooy.
7 Lorgut la dey, orzeꞌ zeed Ñgyoozh gyech nim tooy.
Orzeꞌ gad güiiy.
8 Nit lom dey nu nac de riidz shiñ na nu rniiy.
Na ornu rzac mbecy dey
nu rgyib ziꞌl tooy nu rgubdzaay de mbecy zeꞌ.
9 Orzeꞌ dela mbecy tonaꞌ la dzib dey.
Orzeꞌ gzat dey de coz nu bicy Ñgyoozh,
nunu gyet lag dey cuen de coz nu bicy mi.
10 Orzeꞌ dela mbecy ni Ñgyoozh, gyet lagy dey nu nac de coz nu bicy mi.
Orzeꞌ lo mi zeꞌ cha dey nu laa lagy yu.
De mbecy nu ricy paa nañ lardoo, orzeꞌ gyabic dey gyel mbecy nim.