Dabi mniiy nu ric la añ niy lo Ñgyoozh lat nu gusay de ngush ni Judea
63
Ñgyoozh, ru nac ru biñ nu riib ic ya̱.Gal nu rzac tub mbecy ornu rbigy yu nis nu ric la añ niy loñ,
ni rzac ya̱ nu ric la añ ne̱ nu rlagya̱ nu dzeela̱ ru.
Rsuun lañ ya̱ nu tantaꞌ rlagya̱ nu dzeela̱ ru.
Gal nu rzac yu wach lo nis, niꞌ ziꞌl rzaca̱ lo ru.
2 Ya̱ rlagya̱ gzaca̱ ru nañ yuꞌ yon nir.
Orzeꞌ gzaca̱ nu tantaꞌ fert ru, nunu dzi coz ily nac ru.
3 Gun nap zir nu zaab rca lar ya̱,
gazeꞌ gyel mbañ nu ricy cupa̱ gyishlombecy ii.
Orzeꞌ ya̱ gyabica̱ gyel mbecy nir.
4 Dub laa lat nu rcyiiña̱ gyishlombecy grica̱ gras nir,
nunu shes nañ ya̱a̱ ornu ne̱e̱ du̱ ru.
5 Orzeꞌ gal gyel la ne̱, gal nu ryel ni tub mbecy
ornu row yu tub comid nu dzi nap row.
Orzeꞌ dub gal rii la lagya̱ dula̱ lor nu gyabica̱ gyel mbecy nir.
6 Ornu mbisha̱ lo daꞌ, ca laa ica̱ ru.
Dub laa rel drusha̱ shcab nu nac ru.
7 Gun ru dub laa tiem rlocyuub ru ya̱.
Orzeꞌ ya̱ dub gusht la rcyiiña̱, gal nu rzac tub dzich
ornu ri ma nañ gaꞌl ni loweꞌ ñaa ma.
Gyiꞌ nu dzi yet lagya̱, orzeꞌ dula̱ lor.
8 Ya̱ nicy la bduꞌ ya̱a̱ nañ ru.
Orzeꞌ nu yaa beer nicy nash ru ya̱.
Orzeꞌ wazaan ru nu la coz zaca̱.
9 Zeꞌ de mbecy nu ricy pee nu cut ya̱, de yu zeꞌ cha dey zeꞌ nu yuꞌ de mbecy gut.
10 Nunu gat dey lat gyel yuu.
Orzeꞌ wey gow ma cuerp ni dey.
11 Zeꞌ ya̱, yu nu nac rey, yet lagya̱ nu nac de coz nu ricy Ñgyoozh.
Zeꞌ de mbecy nu rzat Ñgyoozh ornu rnii dey lo losaꞌy nu waded la gyicy yu gal nu rniiy,
de yu zeꞌ gyabic dey gyel mbecy nim.
Tees Ñgyoozh soow mi ruꞌ de mbecy rguu.