Lo Ñgyoozh ziꞌl gac chan laa lagy na: tub riidz ni Dabi
62
Ya̱ zu̱ ri̱ nu leza̱ Ñgyoozh nu co mbañ mi ya̱.Tub zi la lo mi zeꞌ drish lo̱.
2 Gun tub zi la mi zeꞌ zaab ic mi ya̱,
nunu tub zi la mi zeꞌ gac co mbañ mi ya̱.
Mi zeꞌ nam gal nu na tub yuꞌ fert nu cha laa lagy na.
De losaꞌ yu̱u̱ rila wayicy dey gan ya̱.
3 De ru mbecy a̱ꞌ nap, ¿la be ruꞌ dzi nu shet yaa der ya̱?
Gun ya̱ na gal nu na tub loꞌ nu bi zuu la nu gyes saa.
Ni na ya̱.
4 De ru rlagy ru shet gash ru ya̱,
gun orzeꞌ gruu gyel mbecy ne̱.
Gusht ni der nu rguur.
Nu ruꞌ der rniir nu nap zaca̱,
tees nañ lardoo der rzaa lagy ru ne̱.
5 Ya̱ zu̱ ri̱ nu leza̱ nu Ñgyoozh co mbañ mi ya̱.
Tub zi la lo mi zeꞌ drish lo̱.
6 Gun tub zi la mi zeꞌ rzaab ic mi ya̱,
nunu tub zi lam rboo mbañ mi ya̱.
Mi zeꞌ nam gal nu na tub yuꞌ fert nu cha̱ laa lagya̱.
De losaꞌ yu̱u̱ rila wac gyicy dey gan ya̱.
7 Ya̱ drish lo̱ nu Ñgyoozh co mbañ mi ya̱,
nunu drish lo̱ lom nu gyicy mi nu ca lagy mbecy lo̱.
Mi zeꞌ zaab ic mi ya̱,
nunu nam gal na tub yuꞌ nu cha̱ laa lagya̱.
8 De ru mbecy nu yad ca icha̱,
bicy cup der consuel lo Ñgyoozh dub laa tiem.
Mnii lom dela coz deet nu rzac ru.
Gun mi zeꞌ nam gal na tub yuꞌ nu cha̱ laa lagya̱.
9 De mbecy na dey gal na tub nac bi miꞌ nu druu ruꞌn.
Mas mbecy lily, o mbecy gyidz, tees se la la sac dey.
Benu tush peer dey nañ igat beey, rila a̱ꞌ yey.
Dzach zir dey gazeꞌ bi.
10 Cueꞌ cyish lor nu gac cor coz ni mbecy por fers la.
Nunu cueꞌ cyish lor lo de coz nu gyicy gubaan ru.
Mas gyañ gyel nap nir, tees cueꞌ cyish lor looñ.
11 Zañ tir güeña̱ nu rnii Ñgyoozh nu tub zi lam gac gyicy mi dela coz ily.
12 Nunu güeña̱ rniim nu wayecam nu rcam de mbecy.
Ñgyoozh, ru gyabic ru i de mbecy dub gal na mod nu bicy dey.