Gyicy cup na consuel lo Ñgyoozh: tub riidz ni Dabi
61
Ñgyoozh,
bzuub gyidag ornu drish ti̱ du̱ ru.
Bzuub gyidag de coz nu rne̱e̱ lor.
2 Ya̱ drish ti̱ du̱ ru
mas gashtal scyiñ ni gyishlombecy ornu rlazh baloor ne̱.
Orzeꞌ cha nur ya̱ tub lugaar nu a̱ꞌ rishdzidz,
too tub gyitaꞌ ily nu wac chup mbecy.
3 Gun ru nar gal nu na tub lugaar nu cha̱ laa lagya̱,
gal na tub loꞌ nu fert byaa,
nu wac ded mbecy.
4 Rlagya̱ nu zaan ru nu cyiiña̱ nañ yuꞌ yon nir par tub la.
Rlagya̱ nu a̱ꞌ rishdzidz cyiiña̱ gal nu rbi dzich nañ loweꞌ ñaa ma.
5 Gun ru Ñgyoozh,
güeñ ru ornu mne̱e̱ lor coz nu gyicya̱ par ru.
Orzeꞌ gyaꞌn nu bzeeñ ru ya̱a̱,
laabaꞌ ndeꞌ briic ru ni de mbecy nu rdzib lagy lor.
6 Ñgyoozh ru ptuuñ lo yu rey ni de mbecy Israeel,
nunu zaan ru nu tuñ tiem gyub ic de famil niy nu yad par lo.
7 Gyub ic dey nu nac ru,
Ñgyoozh.
Bzaab ic yu gun nac ru biñ nu rca mbecy nunu nac ru biñ nu ricy paa.
8 Orzeꞌ dub laa tiem gyabica̱ gyel mbecy nir lat de riidz nu dula̱.
Orzeꞌ de dzi la gyicya̱ gal nu mne̱e̱ nu gyicya̱.