Tub riidz nu mnii Dabi ornu gucoo de mbecy nez Aram nu bruu Naharaim nu Soba, ornu Joab bicy yu nu cush cya 12,000
60
Ñgyoozh ru bzaan ru de̱ ya̱.Bicy ru nu mnit lo̱ de̱,
gun ru rzi lagy ru lo̱ de̱ na.
Tees na bish cya nu cyid ru lo de̱ tuubaꞌ tir.
2 Ru bicy ru nu briib duru lo yu.
Bicy ru nu bet rich loñ.
Na gyicy nap ruñ, gun bzug lañ.
3 Ru bicy ru nu tonaꞌ la deet rzac de mbecy nir.
Gal rdza la lo dey rzay gal nu rza mbecy rzugy.
4 Na briic tub muesht, Ñgyoozh,
nu gad lagy de mbecy nu rdzib lagy lor
nu gruu chu dey lo de losaꞌ yuuy.
5 Bloo mbañ de̱ nu nac nu dzi fert ru.
Bicy gal nu bdiñ de̱ lor.
Orzeꞌ gruu nap de̱ ya̱ mbecy nu dzi rcar.
6 Ñgyoozh mniim nese nañ yuꞌ yon nim.
Orzeꞌ nam: “Ya̱ yet lagya̱ nu lewa̱ yu ni de mbecy gyedz Siquem,
nunu lewa̱ de yu nu ri de cuit gyerlas ni Sucot.
Orzeꞌ rica̱ de ndeꞌ ni de mbecy ne̱.
7 De lugaar ni Galaad, ndeꞌ nac ñi ne̱.
Niꞌ ziꞌl de lugaar ni Manasés.
Zeꞌ lugaar ni Fraiing, ndeꞌ nañ gal nu na cyug nu zub to̱o̱ ornu rza̱ gyel yuu.
Zeꞌ de lugaar ni Juda, ndeꞌ nañ gal nu na bashto̱o̱
nu nac muesht nu rabee nu riib ica̱.
8 De lugaar ni Moab, ndeꞌ nañ gal nu na ig nu rna̱a̱.
Zeꞌ Edom, ndeꞌ nañ gal nu na tub lugaar nu zeeña̱ gyidlaba̱.
Zeꞌ grishti du̱ de mbecy Filisteo,
gun bicya̱ gan dey lat gyel yuu”, nam.
9 Ñgyoozh, ¿cyu cha nu ya̱ gyedz nu zu loꞌ nu dzi fert byaa, benu walab ru?
¿Cyu cha nu ya̱ lo yu ni mbecy Edom, benu walab ru?
10 ¿A bzu chur de̱ ya̱ na?
¿A waya nu gaꞌr de soldad ne̱ de̱ na?
11 Blocyuub de̱ ya̱ lat gyel yuu ornu chuco̱o̱ de̱ nu de losaꞌ yu̱u̱,
gun se la la cyiiñ ñi benu nu mbecy locyuub yu de̱ ya̱.
12 Tees benu Ñgyoozh locyuub mi de ub na,
orzeꞌ waded la gyicy den gan.
Mi zeꞌ gyicy mi gan de losaꞌ yuu den.