Riidz ni Dabi ornu Sauul bzuu nez yu mbecy nu cha ña dey yuꞌy nu cut dey yu
59
Ñgyoozh ne̱, bloo mbañ ya̱ yaa de losaꞌ yu̱u̱.Psoow ya̱ lo de mbecy nu rlagy shet yaa ya̱.
2 Bloo mbañ ya̱ lat de mbecy shiñ ricy.
Bzu chu ya̱ lat de mbecy nu rut losaꞌ.
3 ¡Güii Ñgyoozh!
Rcach lo dey nez nu rdeda̱ nu rlagy dey cut yu ya̱.
De mbecy fert ryatublaazh dey nu shet yaay ya̱.
Ñgyoozh Shuaan na, walab nu bicya̱ la na tub cyi.
Walab nu guch ñii ne̱ lo ru.
4 Walab nu yuꞌ falt ne̱,
walab ndeꞌ ricy lal ñi dey nu zu lily yu nu shet yaay ya̱.
Cueꞌ zu rir, Ñgyoozh.
Da güiir ya̱, gun orzeꞌ zac ru coz nu ricy dey.
5 Ñgyoozh, biñ nu riib ic nu blaazhaꞌ la soldad zigy,
ru Ñgyoozh ni de mbecy Israeel.
Cueꞌ zu rir.
Da güiir ya̱.
Orzeꞌ zac urlo lar de coz nu rzaca̱.
Briic cashtig ni de mbecy nu a̱ꞌ yuꞌ lo ru
gal nu ni de mbecy nu rbish cya ich losaꞌ.
Cueꞌ gashni lagy ru dey,
gun de yu zeꞌ nac yu mbecy nu rash rash dze ga.
6 Wagad coz nu rlagy dey or widoo.
Orzeꞌ cush cya dey rel lat gyedz.
Rbish ti̱ dey gal nu ricy che̱ꞌ ornu rshi̱ ma.
Orzeꞌ dutuub la lat gyedz rded dey yub yu coz a̱ꞌ nap nu gyicy yu.
7 Zaab ton la rnii dey.
Riidz nu driib ruꞌy nañ gal nu na mandzicy nu dzi zi rnii dey.
“Se cyu la gyeñ de coz nu nii de ub na”, rnii dey.
8 Tees ru, Ñgyoozh, rigy nur dey.
Nunu rgubdzaar de mbecy nu a̱ꞌ yuꞌ lo ru.
9 Zeꞌ ya̱ drish lo̱ lo fers nir.
Ru Ñgyoozh nar gal nu na tub yuꞌ fert nu cha̱ laa lagya̱.
10 Ñgyoozh rcam ya̱.
Mi zeꞌ cyid güiim ya̱.
Orzeꞌ zaan mi nu zaca̱ ornu nit lo de losaꞌ yu̱u̱.
11 Ñgyoozh, cueꞌ cut ru de mbecy a̱ꞌ nap re,
gun orzeꞌ cueꞌ nu nit lagy de mbecy nir lac mod blocyuub ru dey.
Ñgyoozh, biñ nu zaab ic de̱ ya̱, ptush las de yu zeꞌ,
nunu pshet gash dey.
12 Gun ricy dey cyi nu dela riidz nu driib ruꞌy.
Bzaan nu gyicy dey coz ton nu nac nu leꞌy.
Orzeꞌ de coz ton zeꞌ gyac ñi tub caa nu gyet lag laab ub dey.
Rzaa lagy dey ni mbecy, nunu rguuy.
13 Blaazh dey, Ñgyoozh.
Cueꞌ gaꞌ gyiyeeñ ni se tub yu gyishlombecy.
Orzeꞌ nit lo dey nu nac nu dzi rzi lagy yu.
Orzeꞌ dela mbecy gad lagy dey nu zu tub zi Ñgyoozh,
biñ nu riib ic de mbecy Israeel.
Nunu mi zeꞌ riib ic mi dela mbecy nu yuꞌ gyishlombecy.
14 Wagad coz nu rlagy dey or widoo.
Orzeꞌ cush cya dey rel lat gyedz.
Rbish ti̱ dey gal nu ricy che̱ꞌ ornu rshi̱ ma.
Orzeꞌ dutuub la lat gyedz rded dey yub yu coz a̱ꞌ nap nu gyicy yu.
15 Ricy dey gal nu ricy che̱ꞌ ornu rded ma nu ryub ma coz nu gow ma.
Benu wad coz nu gow gyel ma, orzeꞌ rshi̱ ma.
16 Zeꞌ ya̱, rdula̱ de riidz nu rniiñ nu dzi fert ru, Ñgyoozh, Shuaan na.
Or napor ye la rdula̱ nu ru zaab rca lar de̱ ya̱.
Gun par ya̱ ru nar gal nu na tub yuꞌ fert par nu cha̱ laa lagya̱.
Ru nar gal na tub lugaar nu gac cha̱ ornu rzac deeta̱.
17 Ya̱ gyabica̱ gyel mbecy nir, gun ru nac ru biñ nu rzaab ic ya̱.
Ru nar gal nu na yuꞌ fert nu cha̱ laa lagya̱.
Nunu ru biñ nu zaab rca la ya̱.