Dabi rgyiiñ yu gyel fushtiz lo Ñgyoozh
58
De ru mbecy nu riib ic,
¿a rila wayicy der gyel fushtiz nir?
¿A ri beer ni de mbecy mod nu seꞌñ?
2 ¡Rila walab ni ricy ru!
Tub lo ziꞌl nu rboo ic ru de coz a̱ꞌ nap nu gac gyicy ru.
Ndeꞌ par nu shet zir de mbecy ledz ru.
3 De mbecy a̱ꞌ nap nese lat nu ri dey nañ ñaay,
orzeꞌ radzay.
Nunu nese dzi nu ral yu zaab rguu lay.
4 Dza laa nañ lardoo dey yuꞌ coz dañ,
gal nu na nis dañ nu yuꞌ lo lay bily.
Ricy go̱ꞌ dey ub yu,
gal nu na bily go̱ꞌ.
5 Wagyeñ yu gal nu wagyeñ bily ni yu nu rgyit nu ma.
Ornu ricy yu mandaar ma,
orzeꞌ wagyeñ ma de riidz cyudz nu rnii nuy ma.
6 Ñgyoozh,
blaꞌ lay de mbecy nu na gal nu na biidz.
Zeꞌ de biidz feñ bloo lyu de lay bec ma.
7 Bicy nu nit dey gal nu rnit nis gyey ornu drily ñi nu rzañ par gyoow.
Bicy nu zac dey gal nu rzac de gyish nu nash gyernez ornu rawach ñi.
8 De yu zeꞌ gzac dey gal nu rzac bily cyuudz ornu rzuun ma.
Gzac dey gal nu rzac mdoo gut reꞌñ nu wazac yaa ni doo güidz.
9 Sij ziꞌl,
orzeꞌ bi gzac dey gal nu rzac de gyish nu raꞌn mbecy.
Orzeꞌ Ñgyoozh zaꞌ lo num dey lat nu gabee mbañ yu.
10 De mbecy ni Ñgyoozh yet lagy dey
ornu rzac yu nu rza de mbecy cyi lo cashtig.
Orzeꞌ ri chal dey gyiꞌy lo reñ de mbecy a̱ꞌ nap.
11 Orzeꞌ nii de mbecy:
“Rishli Ñgyoozh ryabic mi i de mbecy nu ricy paa nim.
Rishli zu tub Ñgyoozh nu gri bee ni gyishlombecy”,
nii dey.