Tub riidz nu mnii Dabi ornu bicy yu gan briib dzey lo Sauul nañ blyuu
57
Ñgyoozh, gushni lagy ya̱, gun lo ru yapa̱ nu laa lagya̱.Gal nu ricy de dzich nu a̱ꞌ rishdzidz yuꞌ nañ loweꞌ gyid ñaa
ornu yet gyey bi, niꞌ ziꞌl mod cyiiña̱.
A̱ꞌ rishdzidz cyiiña̱ lo ru, gal ded la ni de coz deet.
2 Ñgyoozh, biñ nu gya zir zu, ya̱ drishti̱ du̱m.
Orzeꞌ mi zeꞌ locyuub mi ya̱ nu cuic mi dela coz nu cyiiñ ne̱.
3 Nese gal gyibaa rbic mi nu gad lagy na nu rcam de mbecy,
nunu ricy paam nu nac dey.
Nunu bloom ya̱ yaa de mbecy nu fert zaab icha̱.
4 Ya̱ na gal nu na mbecy nu bi mbish lat de biidz dañ, bañ nu row beel mbecy.
Lay ma nañ gal nu na yag too lyuch nu rded nu de soldad o gal nu na gyech ni guaz.
Lyudz ma nañ gal nu na mandzicy riꞌñ.
5 Ñgyoozh bicy nu gabe nu dzi zily nac ru gyibaa,
nunu blyuu gyel lily nir dutuub la gyishlombecy.
6 De losaꞌ yu̱u̱ bzu dey tub caa nu gyet laga̱.
Orzeꞌ blazh la consuel ne̱ gyiꞌ nu dzi ricy shni̱.
Bduuñ dey tub gyeegy nez nu rdeda̱.
Tees laab ub dey bet lag yu gyeegy niy.
7 Ñgyoozh, ya̱ fert ricy cupa̱ consuel lor.
Ya̱ dula̱ lor, nunu gyabica̱ gyel mbecy nir.
8 Orzeꞌ mne̱e̱ nañ lardo̱o̱: “Briish yaa.
Bzu lily de coz ni musiic,
gun gyabic na gyel mbecy ni Ñgyoozh”, mne̱e̱.
Ya̱ drisha̱ yaa anzir nu grib doo güidz.
9 Ñgyoozh, ya̱ drica̱ gras nir lat de mbecy nir.
Ya̱ dula̱ lor lat de mbecy nu druu reñ ga la lugaar.
10 Gun ru zaab rca lar de mbecy.
Gal nu tonaꞌ la gya baa, ni tant rcar de mbecy.
Gal nu tonaꞌ la gya taꞌ za baa, ni ziꞌl tant ricy paar nur dey.
11 Ñgyoozh bicy nu gabe nu dzi zily nac ru gyibaa,
nunu blyuu gyel lily nir dutuub la gyishlombecy.