Tub riidz nu mnii Dabi ornu bdub mbecy Filisteo yu Gat
56
Gushni lagy ya̱ Ñgyoozh,gun de mbecy rshet yaa dey ya̱.
De losaꞌ yu̱u̱, de dzi la rted ziy ya̱.
2 Ricy ras nuy ya̱ dub laa tiem.
Zigy dey ricy leꞌy nu rucoo nuy ya̱.
3 Tees ornu rdziba̱, orzeꞌ ricy cupa̱ consuel lo ru Ñgyoozh.
4 Ya̱ ricy cupa̱ consuel lor.
Orzeꞌ wacchiba̱.
Orzeꞌ ya̱ ryabica̱ gyel mbecy nir nu nac de coz nu mniir nu gyicy ru.
Orzeꞌ de yu nu nac gur mbecy ziꞌl,
orzeꞌ ¿la ñuu coz gac gyicy nu de yu zeꞌ ya̱?
5 Gua la dzi ryub dey mod nu gyicy deet yu.
De tiem la rboo ic dey de mod nu gyicy ñi nu zac zi̱.
6 Rya tublaazh dey de lugaar ngach.
Rsiiñ dey ne̱.
Rbez dey nu cut yu ya̱.
7 Ñgyoozh, briic cashtig ni dey nu nac de coz a̱ꞌ nap nu ricy yu.
Pshes saa dey nu nac nu dzi rzi lagy ru loy.
8 Ru rad lagy ru nu deet rac nañ lardo̱o̱.
Tub ndzu̱j ga de nis nu briib urlo̱, delañ bi ngab ñi nir.
¿A walab nu delañ bi cañ lo gyicy nir, Ñgyoozh?
9 Dzi nu gredza̱ ru Ñgyoozh, orzeꞌ de losaꞌ yu̱u̱ gya ich dey gyay.
Nii tub coz nu nap rad lagya̱: nu Ñgyoozh zam faboor ne̱.
10 Laab mi zeꞌ Ñgyoozh, Shuaan na,
biñ nu ryabica̱ gyel mbecy ni
nu nac de coz nu mniim nu gyicy mi.
11 Ya̱ ricy cupa̱ consuel lom, nunu wacchiba̱.
Orzeꞌ de yu nu nac gur mbecy ziꞌl,
¿la ñuu coz gac gyicy nu de yu zeꞌ ya̱?
12 Ñgyoozh, ya̱ gyicy yaca̱ ni de riidz nu mne̱e̱ lor.
Ya̱ rica̱ tub bañcyug nu gac ma gun lor
par nu gabe nu rica̱ gras nir.
13 Gun ru bloo mbañ ru ya̱, nunu wasaan ru nu lagy gyi̱ꞌ.
Gun orzeꞌ chesa̱ lo ru lat yaa nu rbic ru lat de mbecy mbañ.