Dabi rnii nuy Ñgyoozh ornu zaab mbecy ich yu
55
Ñgyoozh, zuub gyidag ru ornu rne̱e̱ du̱ ru.Cueꞌ cach lor ornu rnishba̱a̱ lor.
2 Nap bduꞌ cuen coz nu rne̱e̱,
nunu bicy gal nu ya̱ rne̱e̱.
Gun tonaꞌ la blazh fers ne̱ nu dzi rsug ica̱.
3 Ya̱ dzi rzac deeta̱ nu nac de riidz a̱ꞌ nap nu rnii de losaꞌ yu̱u̱.
Deet rac nañ lardo̱o̱ nu nac de coz nu ricy de mbecy a̱ꞌ nap.
Ricy dey nu rzac deeta̱.
Ricy ras nu dey ya̱ nu rzi lagy yu lo̱.
4 Tonaꞌ la rdziba̱ nañ lardo̱o̱.
Nunu rdziba̱ nu gata̱.
5 Gush la bisa̱ nu rdziba̱.
Guayoꞌ la nu rag cuerp ne̱ nu rdziba̱.
6 Orzeꞌ mnii to̱o̱: “Dzi ga nap bi bicy na nu gyicy cupa̱ lowe̱ꞌ gal na tub begy.
Orzeꞌ gyes naña̱ lo bi nu cha̱ zet.
Orzeꞌ gad nu zu lagya̱.
7 Zet cha̱ lo bi.
Orzeꞌ cyiiña̱ tub lugaar ub zi.
8 Orzeꞌ dach zir gyicy lala̱ nu yuba̱ tub lugaar nu gla̱ lo gyey bi ily.”
9 Ñgyoozh, bicy nu nit lo de losaꞌ yu̱u̱.
Bicy nu shees de coz nu nii dey.
Lat gyedz rzaca̱ nu shiñ ricy nu dey losaꞌy.
Rzaca̱ dey nu ryach yu nu losaꞌy.
10 Dzi rel la rza dey dub yub la too loꞌ nu zu ruꞌ gyedz.
Zeꞌ par lat gyedz ricy dey gyel gurfeñ,
nunu ricy dey coz deet.
11 Mnu la coz nu rac dutuub la lat gyedz.
De lat cay ga ub nu ricy ziꞌl dey gan losaꞌy,
nunu rguu losaꞌ dey.
12 Ya̱ gagye̱ lo de losaꞌ yu̱u̱, benu gyigy nu naañ dey ya̱.
Ya̱ gac cach lo̱ lo de losaꞌ yu̱u̱, ornu ricy ñgya dey lo̱.
13 Tees laab de ru ndeꞌ: tub mbecy nu guc losa̱ꞌ,
tub mbecy nu gusa du̱, mbecy nu guc amig ne̱.
14 Gulas, tonaꞌ la nap bdo̱ de̱ riidz nu losa̱ꞌ.
Tublaazh la gua de̱ nañ yuꞌ yon ni Ñgyoozh.
15 Ya̱ rlagya̱ nu gat de losaꞌ yu̱u̱ anzir nu shuub dzi ni dey.
Rlagya̱ nu mbañ laa dey gyay lat de mbecy gut.
Gun ri coz a̱ꞌ nap nañ yuꞌy, nunu ri coz a̱ꞌ nap nañ lardooy.
16 Zeꞌ ya̱ gredza̱ Ñgyoozh nu locyuub mi ya̱.
Gun mi zeꞌ co mbañ mi ya̱.
17 Ya̱ nu nis urlo̱ rne̱e̱ du̱m or napor, nu or widoo, gal nu or bi rel.
Rne̱e̱ nu rzac zi̱.
18 Orzeꞌ mi zeꞌ gyicy mi nu gruu napa̱ lat de gyel yuu nu chuꞌ,
gun de losaꞌ yu̱u̱, yu nu cha contr ne̱, dzi zigy dey.
19 Orzeꞌ Ñgyoozh biñ nu riib ic nese nu loga la,
mi zeꞌ gyeñ mi ornu ne̱e̱ du̱m.
Orzeꞌ gyicy mi nu nit lo dey.
Gun de yu zeꞌ wac chaa dey mod nu cyiiñ yu.
Ni wac chib lagy dey lom.
20 Na pshet yaa dey de mbecy nu guc amig niy gulas.
Wagyicy yac dey nu trat nu bicy nuy dey.
21 Zeꞌ de riidz nu rnii dey, cyudz zir zañ gazeꞌ nu dab naa za.
Zeꞌ nañ lardooy tonaꞌ la rzi lagy yu.
Riidz nu rnii dey ricy ñi gal nu ricy asecy
nu nap zu lagy na ornu rily nañ lon.
Tees dzi zir ricy ñi da̱y gazeꞌ tub mandzicy riꞌñ.
22 “O” mnii nu co Ñgyoozh dela coz deet nu yuꞌ nañ lardoor.
Orzeꞌ laab mi cuic mi fers nir.
Gun mi zeꞌ rila wazaan mi nu nit lo de mbecy nu rzuub gyidag nim.
23 Zeꞌ de mbecy nu rut losaꞌ,
de mbecy rguu
ru Ñgyoozh shet lag ru dey gal zeꞌ nu gyi zir ni lugaar nu yuꞌ de mbecy gut.
De yu zeꞌ washuub dey ni cyaal tiem nu rlagy ñi nu gzuy gyishlombecy.
Orzeꞌ gat reꞌñ yu.
Zeꞌ ya̱ ricy cupa̱ consuel lo ru.