Shiñ na nañ lardoo mbecy: tub riidz ni Dabi
53
I rnii de mbecy ton:
“Sac Ñgyoozh”,
rnii dey.
Nac dey mbecy a̱ꞌ nap,
nunu ricy dey coz nu tonaꞌ la shiñ na.
Sac ni tub mbecy nu gyicy yu coz nap.
2 Gashtal gyibaa Ñgyoozh rgüiim lo de mbecy gyishlombecy ii,
par nu zac mi ben a yuꞌ mbecy nu ricy cup shcab nu ryub yum.
3 Tees dela mbecy bruu chu dey nez nim.
Tub ziꞌl nu na dela dey nu a̱ꞌ nap yu.
Ni tub yu rila wagyicy yu gal mod nu rlagy ñi.
4 Orzeꞌ na Ñgyoozh:
“¿A wagad lagy la dey?,
de mbecy nu shiñ ricy ii.
Zaꞌ lo dey de mbecy ne̱ gal nu zaꞌ lo dey gyishtily ornu row yuñ.
Nunu rila wagnii nu dey ya̱”,
nam.
5 Tees zeꞌ bi zu de losaꞌ yuu de mbecy nim.
Orzeꞌ rii la gyet nu rag ich dey nu tantaꞌ rdzib yu.
Ni wagad lagyaꞌ dey la coz gyicy yu tantaꞌ rdzib yu.
Ñgyoozh cut mi dey.
Orzeꞌ tush las mi rit yu.
Orzeꞌ gruu gyel mbecy ni dey,
gun Ñgyoozh neꞌm yu.
6 ¡Dzi ga nap benu lat gyedz Sión gruu zac mod nu gruu mbañ mbecy Israeel!
Tonaꞌ la gyet lagy de mbecy Israeel
ornu Ñgyoozh gyicy mi nu gruu nap dey tuubaꞌ tir.