Riidz nu mnii Dabi ornu Doeg gua niiy lo Sauul nu Dabi bded yu yuꞌ Ahimelec
52
Ru mbecy lily,
¿lagu ricy leꞌr nu nac de coz a̱ꞌ nap nu ricy ru?
Zeꞌ Ñgyoozh dub laa tiem ricy paam.
2 Rboo ic ziꞌl ru nu lac mod guur mbecy.
Lyudz ru nañ gal nu na tub gyiscyiib nu tonaꞌ la riꞌñ ruꞌ.
Nunu zaab rnii zir toor nu nac de coz a̱ꞌ nap nu ricy ru.
3 Dzi zir yet lagy ru de coz a̱ꞌ nap,
gazeꞌ de coz nap.
Yet zir lagy ru de coz fals,
gazeꞌ de coz rishli.
4 Dzi yet lagy ru,
ornu rzac ru nu rzac zi mbecy nu nac de riidz nu rniir.
¡Mbecy rguu!
5 Orzeꞌ Ñgyoozh nit lom ru par tub la.
Mi zeꞌ com ru nañ yuꞌr.
Mi zeꞌ co lyum ru lo yu,
zeꞌ nu rcyiiñ de mbecy mbañ.
6 De mbecy nap gzac dey de nu ndeꞌ.
Orzeꞌ dzib lagy dey.
Orzeꞌ gyigy nu dey ru.
Orzeꞌ nii dey:
7 “¡Güii!
Ii zu tub mbecy
nu wangyicy cup consuel lo Ñgyoozh
nu mboo mbañ mi yu.
Ca lo de gyel nap niy bicy cup yu consuel.
Lo de coz a̱ꞌ nap nu bicy yu,
lo ndeꞌ briish loy nu locyuub ñiy”,
nii dey.
8 Zeꞌ gal nu fert zub tub ya oliva caꞌ,
niꞌ ya̱ fert nasha̱ nañ yuꞌ ni Ñgyoozh.
Ya̱ ricy cupa̱ consuel lo Ñgyoozh,
gun mi zeꞌ rcam ya̱ dub laa tiem.
9 Ñgyoozh,
ya̱ dub la tiem drica̱ gras nir nu nac de coz nu bicy ru.
Orzeꞌ ya̱ rne̱e̱ nu dzi nap ru lat de mbecy nir.