Riidz ni Dabi tiem nu mnii nu Natán yu nu nac cyi nu bicy nuy Betsabé
51
Ñgyoozh, gush ni lagy ya̱ nu nac nu rila wachecar nu rcar ya̱.Cyib ru dela cyi nu bicya̱, ornu wansuub gyidaga̱ nir,
gun ru tonaꞌ la rashni lagy ru ya̱.
2 Cyib ru dela cyi nu ricy cupa̱, ornu bicya̱ de coz a̱ꞌ nap.
Caacy la cyib ru dela cyi nu bicya̱.
3 Ya̱ rduꞌ lo̱ dela falt nu guꞌ ne̱.
Ri lañ to̱o̱ dub laa tiem.
4 Tub zi la ya̱ bicya̱ cyi nu za contr ni ru.
Lo ru Ñgyoozh, ya̱ bicya̱ coz nu shiñ zir na.
Orzeꞌ nap mniir ornu mniir nu naca̱ mbecy cyi.
Seꞌñ bicy ru ornu mniir nu yuꞌ falt ne̱.
5 Ya̱ naca̱ mbecy shiñ ricy nese dzi nu gula̱.
Nese dzi nu guti̱ nañ ñaa ornu guꞌ iꞌñ mi, nese tiem zeꞌ bi naca̱ mbecy cyi.
6 Ru dzi rcar mbecy ornu li zay nañ lardooy.
Orzeꞌ bicy nu nap gad lagya̱ shcab nir nañ lardo̱o̱.
7 Gyicy ru nu nit lo de cyi nu ricy cupa̱.
Orzeꞌ gyaca̱ mbecy nu caacy lardoo.
Cyib ru ya̱.
Orzeꞌ caacy iily la lardo̱o̱ gyac ñi gal nu na gyey.
8 Gyicy ru nu gyet lagy gyel la̱.
Mas ya̱ gua̱ lo daꞌ nu gush güi̱i̱,
tees orzeꞌ gyet lagya̱ tuubaꞌ tir.
9 Ñgyoozh cueꞌ gaꞌ niir nu naca̱ mbecy cyi,
nunu cyib ru dela coz shiñ na nu bicya̱.
10 Ñgyoozh bicy caacy nañ lardo̱o̱.
Gyicy ru nu gyaca̱ tub mbecy cub,
mbecy nu gyicy paa nañ lardoo.
11 Cueꞌ cyuu nur ya̱, nu gruu chu̱ lor,
nunu cueꞌ gyicy ru nu gruu chu Espiriit Yon nir lo̱.
12 Gyicy ru nu gyet lagya̱ tuubaꞌ tir nu nac nu rboo mbañ ru ya̱.
Orzeꞌ laagy naañ ru ya̱ nu Espiriit Yon nir.
13 Orzeꞌ ya̱ lyu̱u̱ ni de mbecy cyi, de coz nu rlagy ru.
Orzeꞌ de yu zeꞌ cush cya dey lor tuubaꞌ tir.
14 Ñgyoozh cueꞌ zaan ru nu gata̱,
gun ru nac ru biñ nu rboo mbañ ya̱.
Orzeꞌ ya̱ ne̱e̱ lo de mbecy nu ru dzi nap bicy nur ya̱.
15 Ñgyoozh, Shuaan na, locyuub ru ya̱ nu grib riidz ru̱ꞌ.
Orzeꞌ ya̱ gyabica̱ gyel mbecy nir.
16 Gun ru wagyedzuꞌ lagy ru benu rica̱ gun lor.
Be bicy na nu gyet lagy ru nu zaaya̱ tub bañcyug nu gac ma gun lor,
orzeꞌ ndeꞌ gyicya̱.
17 Ñgyoozh, gun nu ru gyet lagy ru,
ndeꞌ nu nañ lardo̱o̱ gaca̱ mbecy shni.
Gun ru wacaa chu lor lo mbecy benu a̱ꞌ leꞌy,
nunu benu ricy shniy nu nac de cyi nu bicy yu.
18 Nap bicy nu gyedz Sión.
Bicy nap loꞌ nu zu dub yub la ruꞌ gyedz Jerusaleeng.
19 Orzeꞌ gyet lagy ru ornu mbecy cuic yu gun lor gal mod nu rlagy ñi
nunu ornu zaay dey bañcyug lor.
Orzeꞌ de mbecy cuic yu tor nu gac ma gun lo cuug nir.