Ñgyoozh zaꞌ lom mod nu seꞌñ: tub riidz ni Asaf
50
Ñgyoozh Shuaan na, biñ nu gac gyicy dela coz, rniim.Rbedz mi dela mbecy nu yuꞌ gyishlombecy,
de mbecy nu rcyiiñ gal zeꞌ nu driib doo güidz,
nu de mbecy nu rcyiiñ gashtal zeꞌ nu rza doo güidz.
2 Rabee gyel lily ni Ñgyoozh gal nu rabee tub yaa nu druu Sión,
tub gyedz nu blaazhaꞌ zir cyit zu.
3 Ornu ryeed Ñgyoozh, walab nu ri zu la lat nu ryeed mi,
sinu ryeed mi lat tub gyi ily.
Ryeed mi lat tub gyey bi ily.
4 Cuedz mi de mbecy gyibaa gal nu de mbecy gyishlombecy nu gac dey teshtig
ornu gri beem ni de mbecy nim.
5 “Bicy tublaazh de mbecy nu zu chu nu gyac ne̱, de yu nu bicy trat nu ya̱,
ornu biit dey bañcyug nu guc ma gun lo̱”, nam.
6 De mbecy gyibaa nii dey nu Ñgyoozh nac mi biñ nu gri bee,
nunu nac mi biñ nu ricy coz nu seꞌñ.
7 Orzeꞌ na Ñgyoozh: “De ru mbecy ne̱, bzuub gyidag der lat nu rne̱e̱.
De ru mbecy Israeel, ya̱ riiba̱ cyi ic ru.
Gun ya̱ naca̱ Ñgyoozh, Ñgyoozh ni de ru.
8 Ya̱ walab nu rdza̱ꞌ ni der nu nac de bañcyug nu rbic ru nu gac ma gun lo̱.
Nunu walab nu rdza̱ꞌ ni der nu nac de bañcyug nu zaab rzaay lar lo̱.
9 Tees de tor nu taꞌ roꞌr, ma zeꞌ walab bañcyug nu cyiiñ ne̱.
Niꞌ ziꞌl de chiib nu druu lat de bañ nu rñar walab bañcyug nu cyiiñ ne̱.
10 Gun de lo la bañgyish nu yuꞌ gyishlombecy nac ma ne̱.
Nunu be miily de too bicy yuꞌ de chigud nu nac ma bañcyug ne̱.
11 Dela chigyiñ nu rded lo bi nac ma ne̱,
nunu dela bañcyug mbañ nu rcyiiñ ngush nac ma ne̱.
12 Benu ya̱ rana̱, orzeꞌ ya̱ wadiña coz nu da̱w lo de ru,
gun gyishlombecy nu dela coz nu yuꞌ loñ nac ñi coz ne̱.
13 ¿Walab gaal gac da̱w beel tor,
o nu do̱ꞌ reñ chiib?
14 Gun nu rbic der lo ya̱, Ñgyoozh, biñ nu gya zir zu,
ndeꞌ nu rbic der gras ne̱.
Nunu gyicy yac der nu de riidz nu rniir lo̱ nu waded la gyicy ru.
15 De dzi nu yuꞌ coz deet, orzeꞌ cuedz ru ya̱.
Orzeꞌ ya̱ loo mbaña̱ ru.
Orzeꞌ ru gyabic ru gyel mbecy ne̱”, na Ñgyoozh.
16 Orzeꞌ na Ñgyoozh rab mi de mbecy a̱ꞌ nap:
“¿La ñuu cyiiñ ñi ni der nu gzat ru de riidz nu rne̱e̱ nu gyicy ru?
¿La coz cyiiñ ñi ni der nu gor riidz nu nac de ndeꞌ?
17 Gun de ru walagy ru nu gyicy napa̱ ru.
Nunu rzu chu der de coz nu rne̱e̱ nu gyicy yac ru.
18 Ornu rzac ru tub gubaan, orzeꞌ ricy amig nir yu,
nunu nac nur de mbecy nu ral losaꞌ nu wanchelaa.
19 “O”, rniir nu grib riidz a̱ꞌ nap ruꞌr.
Nunu rila wachecar nu rguur.
20 Bi zuu lar nu griib ru cyi ic bicy ru.
Ryub ru cyi nu griib ru tooy.
21 Mas bicy ru de coz zeꞌ, orzeꞌ ya̱ se la la coz mne̱e̱.
Orzeꞌ ru mnii toor nu gal nu na ru, niꞌ ziꞌl na ya̱.
Tees na, ya̱ shuu du̱ ru, nunu naal la shaala̱ de coz ii lor.
22 “De ru mbecy nu wagyicy cuen ya̱, bzuub gyidag der nis nit lo̱ ru.
Orzeꞌ sac cyu nu co mbañ ru.
23 Benu cuic ru gras ne̱, ndeꞌ gun nu rlagya̱.
Orzeꞌ waded la loo mbaña̱ dela mbecy nu gzuub gyidag ne̱”, na Ñgyoozh.