Mbecy ton ricy cup yu consuel lo gyel nap: Tub riidz ni mbecy nez Coré
49
Dela de ru mbecy, ¡bzuub gyidag der!¡Bzuub gyidag de ru mbecy nu yuꞌ dutuub la gyishlombecy!
2 ¡Bzuub gyidag de ru mbecy lily,
nunu bzuub gyidag de ru mbecy shni!
¡Bzuub gyidag de ru mbecy guaniꞌñ,
nunu bzuub gyidag de ru mbecy zi!
3 Ya̱ ne̱e̱ riidz nu lyuuñ ni der de coz nu ricy ñi presis.
Coz nu yuꞌ nañ lardo̱o̱, ndeꞌ gyicy ñi nu gyalily na der.
4 Ya̱ bduꞌ cuena̱ de rishcyit nu mnii de gyitoo bel.
Lat nu rsheta̱ lo beeñ arpa,
orzeꞌ rshaala̱ lac yaruuñ.
5 ¿Lagu dziba̱ tiem nu gac deet?
Ornu de coz a̱ꞌ nap nu ricy de losaꞌ yu̱u̱ gri loꞌñ ya̱,
orzeꞌ ¿lagu dziba̱ tiem ze?
6 Zeꞌ de yu zeꞌ gyicy cup dey consuel lo de gyel nap niy,
nunu griib zily dey laab ub yu nu nac nu dzi guaniꞌñ dey.
7 Ni tub la mbecy wac cyish yu lo Ñgyoozh nu gruu mbañ losaꞌy.
Ni wac cyish yu nu gruu mbañ ub yu.
8 Gun dzi ga ñgyup sac lardoo mbecy.
Orzeꞌ wal tiñ ni de mbecy nu cyish yu
9 par nu cueꞌ chay zeꞌ nu yuꞌ mbecy gut.
Zeꞌ rlagy yu nu cyiiñ yu tub la.
10 Tees rabee nu tub ziꞌl mod gat mbecy mas siñ tooy,
mas nac yu mbecy ton, o mas nac yu mbecy yuꞌ shcab ni.
Tees nil zeeñ yu gyel nap niy yaa reñaꞌ mbecy.
11 Orzeꞌ gyerbaa zeꞌ gyiyeeñ dey par tub la.
Zeꞌ gyiyeeñ dey dub laa tiem nu yad par lo,
mas bicy cup dey yu gyishlombecy ii anzir nu gat yu.
12 Gyel lily ni mbecy wac gyicy ñi nu wat yu.
Orzeꞌ waded la gat yu gal mod nu rat de bañcyug.
13 Ndeꞌ nez nu cha de mbecy nu ricy cup consuel lo ub ziꞌl.
Ni mod gyaꞌ lo de mbecy ornu rnii tooy nu beñ na gyaꞌn nu cha loy.
14 Bi ca lo cuen nu cha dey zeꞌ nu yuꞌ de mbecy gut gal nu rzac shily.
Orzeꞌ gyel gut chetib ic ñi dey gal nu rzetib ic mbecy nu rña shily.
Orzeꞌ de mbecy nap gyicy yu gan de mbecy zeꞌ
lat nu yuꞌ dey nu rtop cuerp niy zeꞌ nu yuꞌ de mbecy gut.
Orzeꞌ lugaar zeꞌ gac ñii ledz dey.
15 Zeꞌ ya̱, Ñgyoozh cyish mi gyiꞌ lardo̱o̱
par nu cueꞌ gya̱ zeꞌ nu yuꞌ de mbecy gut.
Orzeꞌ gyash mi ya̱.
16 Cueꞌ zaan ru nu gac deet nañ lardoor
ornu rzac ru nu yaguaniꞌñ tub losaꞌr,
ornu ryañ de yuu nañ yuꞌy.
17 Ornu gat yu wac gya nuy ni tub la coz.
Wac gyet yu nu gyel nap niy lugaar zeꞌ nu yuꞌ de mbecy gut.
18 Mas mbecy yet lagy yu nañ lardooy lat nu rcyiiñ yu gyishlombecy,
mas dzi driib zily mbecy yu nu nac nu dzi yuꞌ gyel nap niy,
19 tees de yu zeꞌ gyatublaazh yu nu de gyitoo bel niy ornu gat yu.
Orzeꞌ gyiyeeñ dey zeꞌ nu cow par tub la.
20 Gyel lily ni mbecy wac gyicy ñi nu wat yu.
Orzeꞌ waded la gat yu gal mod nu rataꞌ ziꞌl de bañcyug.