Coz ily nac Sión, gyedz ni Ñgyoozh: Tub riidz ni mbecy nez Coré
48
Ñgyoozh Shuaan den, tonaꞌ la zily nac mi,nunu lat gyedz nim, tonaꞌ la rlagy ñi nu gyabic den gyel mbecy nim, gal nu too bicy yon nim.
2 Bicy Sión, bicy ni Ñgyoozh, tonaꞌ la cyit nañ, nunu tonaꞌ la gya tooñ.
Dela mbecy gyishlombecy yet lagy dey nu nac gyedz nim,
gun mi zeꞌ biñ nu nac rey nu gya zir zu.
3 Ñgyoozh bicy mi nu gud lagy dey
nu sac rishdzidz zeꞌ nu zum nañ loꞌ nu zu dub yub la ruꞌ gyedz nim.
4 Orzeꞌ de rey byatublaazh dey nu shet yaay gyedz nim.
5 Tees ornu bzaac dey gyedz nim,
orzeꞌ za nu la ic yu.
Orzeꞌ gudzib dey gush yu carer yay.
6 Gush la bis dey nu gudzib yu, gal nu rzac biñ mñaa ornu rac nim nu bi gaal mi mdoo.
7 Ru blaꞌr de barc ni de mbecy Tarsis nu bi nu bzeed ru nu bruu gal zeꞌ driib doo.
8 Na bi güeñ de̱ de coz nu bicy Ñgyoozh.
Na bzaac ur lo̱ la̱ de̱ de coz zeꞌ lat gyedz nim, biñ nu riib ic zañ nac de anc.
Mi zeꞌ wazaan mi nu se la la coz zac gyedz nim, ni tub la coz deet par tub la.
9 Ñgyoozh, de̱ ya̱ drush de̱ shcab nu ru zaab rca lar de̱ ya̱ nañ yuꞌ yon nir.
10 De mbecy nu rcyiiñ dela lugaar ni gyishlombecy griib zily dey ru.
Orzeꞌ gad lagy dey nu dzi lily nar par dutuub la gyishlombecy.
Nunu ru riib ic ru nu gyel fushtiz.
11 Orzeꞌ dela mbecy nu yuꞌ bicy Sión gyet lagy dey.
Ru gzaꞌ lor ni de mbecy gal mod nu seꞌñ.
Orzeꞌ de mbecy nu yuꞌ de gyedz ni Juda gyet lagy dey.
12 De ru mbecy ni Ñgyoozh, gusa der dub yub la ruꞌ gyedz Sión.
Blab der de lugaar nu zub gya, zeꞌ nu rgua de yu nu rña.
13 Nap bduꞌ cuen de loꞌ nu zu dub yub la ruꞌ gyedz.
Nunu nap bduꞌ cuen la na de yuꞌ fert,
zeꞌ nu cha de mbecy nu cach loy ni de losaꞌ yuuy.
Ni gyicy ru, gun orzeꞌ gac niir lo de mbecy nu yad par lo nu
14 mi zeꞌ Ñgyoozh, biñ nu nac Ñgyoozh ni den par tub la.
Mi zeꞌ cuic mi nez nu chan par de tiem nu yad par lo.