Ñgyoozh nac num de ub na: Tub riidz ni mbecy nez Coré
46
Ñgyoozh nam gal na tub lugaar nu cha nu laa lagya̱.Mi zeꞌ biñ nu cuic fers nin.
Bi zum nu locyuub mi de ub na tiem nu gac deet.
2 Ndeꞌ nu wadzib na mas grib duru gyishlombecy.
Wadzib den mas gyet lag de bicy ily gal iiñ nisyudoo.
3 Wadzib na mas de nisyudoo se bdziñ ziꞌl rbooñ,
mas coz ily ricy ñi nu zu redz, gal nu ricy tub bañ show,
nunu mas ricy ñi nu rcueñ de bicy nu nac de fers niñ.
4 Rib tub gyoow.
Orzeꞌ de mbecy nu yuꞌ gyedz ni Ñgyoozh, biñ nu gya zir zu,
de yu zeꞌ gyet lagy dey nu nac gyoow zeꞌ.
5 Ñgyoozh zum lat gyedz zeꞌ.
Orzeꞌ gyedz zeꞌ rila wanit loñ,
gun mi zeꞌ bi zum nu locyuub miñ tiem niñ.
6 Reñaꞌ mbecy ricy dey nu zu redz, nu tantaꞌ nu rdzib dey,
nunu de rey nu riib ic reñaꞌ mbecy bis la rash ñi dey,
gun Ñgyoozh zaab tiꞌm nu rniim gal nu rnii guzii.
Orzeꞌ gyishlombecy rzuun ñi.
7 Ñgyoozh biñ nu riib ic zañ nac anc, mi zeꞌ nac num de ub na.
Laab mi zeꞌ, biñ nu briib zily Jacob.
Mi zeꞌ nam gal nu na tub lugaar nu chan nu glaa lagy na.
8 Da güii der de coz nu bicy mi.
Cha du ic na de coz nu bicy mi gyishlombecy.
9 Bicy mi nu guri gyel yuu dutuub la gyishlombecy.
Pcyicy mi de guaz.
Mnit lom de yag too lyuch.
Nunu pcaam gyi de yala she nu rsoow cuerp ni de soldad.
10 Orzeꞌ na Ñgyoozh: “Bzu ri der.
Orzeꞌ bicy der nu gad lagy ru nu ya̱ naca̱ Ñgyoozh,
biñ nu gya zir zu gazeꞌ de lo la mbecy,
nunu gya zir zu̱ gazeꞌ dela mbecy nu yuꞌ gyishlombecy.”
11 Ñgyoozh, biñ nu riib ic zañ anc, nac num de ub na.
Laab mi zeꞌ, biñ nu briib zily Jacob.
Mi zeꞌ nam gal nu na tub lugaar nu chan nu glaa lagy na.