Riidz nu dunii ornu chelaa rey: Tub riidz ni mbecy nez Coré
45
Dza laa nañ lardo̱o̱ yuꞌ de riidz cyit na, lat nu rne̱e̱ ñii lo rey.Lyudza̱ nañ gal nu na lap ni mbecy nu nap rcaa de riidz lo gyicy.
2 Ru cyit zir rabeer, gazeꞌ deꞌ zir yu gyeey.
Dzi cyudz za de riidz nu rniir.
Ñgyoozh tonaꞌ la nap ricy num ru dub laa tiem.
3 Rey fert, bzaab gyid yuꞌ mandzicy nir ruꞌ bay ru,
gun ndeꞌ muesht ni gyel lily nir, gal nu de gyel fushtiz nir.
4 Byub cuay nir, gal nu ricy mbecy nu ricy cup gyel fushtiz.
Orzeꞌ gyicy ru gan de losaꞌ yuur.
Nunu gyicy ru gyel fushtiz nu de mbecy shni̱.
Tonaꞌ la coz ily gyicy ru gan nu nac nu dzi fert ru.
5 Tonaꞌ la lyuch lo gyech nu zeed ru nu guaz nir.
Gyow ñi gashtal ich añ ni de losaꞌ yuur.
Bee nac laa dey gyes saay yeñ gyiꞌr.
6 Gyel fushtiz nu briic Ñgyoozh nir, ndeꞌ gzuñ par tub la.
7 Ru yet lagy ru mod nu seꞌñ.
Zeꞌ coz a̱ꞌ nap nu ricy mbecy, rzi lagy ru looñ.
Ndeꞌ nu Ñgyoozh, biñ nu nac Ñgyoozh nir, pcuim ru,
nunu briic zir mi nu zu cyit lagy ru, gazeꞌ deꞌ zir de rey.
8 Zguul tiꞌ shab ru.
Tiꞌ mirra, nu áloe, nu canel.
De musiic ricy dey di lor nañ yuꞌ cyit na nir,
yuꞌ nu bicy zig dey nu tub lo rit cacy.
9 Lat de biñ mñaa nu yatublaazh lor, yuꞌ fiñ nu nac iꞌñ rey.
Zeꞌ par yaa beer zu fiñ nu chelaar.
Bdudiiñ nu or ga ub.
10 Ru, fiñ nu chelaa rey, bzuub gyidag coz nu ne̱e̱ lor.
Bloo ic de famil nir nu de losaꞌr.
11 Nu dzi yalagy nar, ndeꞌ nu yet lagy rey ru.
Yu zeꞌ nac yu shuaan ru.
Ndeꞌ nu rlagy ñi nu zuub gyidag ru niy.
12 Ru, fiñ nu bruu Tiro,
de mbecy nu guaniꞌñ zir Tiro rlagy dey nu gyet lagy ruy.
Ndeꞌ nu cha nu dey la coz ganir.
13 Fiñ nu chelaa rey bi zuñ yuꞌy.
¡Dzi ga yalagy nañ!
Nu duu iily or bdugab shab ñi.
14 Ornu rzuñ negy zañ coloor,
orzeꞌ de mbecy rza nu dey ñi lo rey.
De fiñ nu rzu bich nu nac ñii, rza ca deñ par ich ñi
ornu rzañ lo rey.
15 Orzeꞌ zu cyit lagy deñ,
ornu rzuꞌñ nañ yuꞌ ni rey.
16 Ru, rey ne̱ zañ yu nguzh nir chuꞌy.
Orzeꞌ tub yu chuꞌy lo riiñ ni too bel nir ornu gya guush yu.
Orzeꞌ gyicy ru nu gyub ic yu dela lugaar ni de mbecy Israeel.
17 Orzeꞌ ya̱ gyicya̱ nu gyezaꞌ lagy de mbecy ru par tub la.
Orzeꞌ dela mbecy griib zily dey ru dub laa tiem nu yad par lo.