Ñgyoozh da güiir de̱ ya̱: Tub riidz ni mbecy nez Coré
44
Ñgyoozh, güeñ gyidag la̱ de̱ de riidz nu mniir lo de gyi too bel ne̱ de̱,de riidz nu rniiñ de coz ily nu bicy ru tiem ni dey, tiem nu guꞌ dey gulas.
2 Güeñ de̱ nu lac guc ornu ru pcyuu nur de mbecy nu a̱ꞌ yuꞌ lo ru.
Orzeꞌ bguꞌr de mbecy nir zeꞌ nu pcyiiñ dey.
Nunu güeñ de̱ lac guc ornu briic ru cashtig ni reñaꞌ mbecy.
Zeꞌ de mbecy nir, bicy ru nu guchuꞌ nap dey lo ledz yu.
3 De mbecy nir walab nu bicy dey gan de mbecy nu rcyiiñ lugaar zeꞌ nu mandzicy niy;
ni walab nu bicy dey gan nu nac nu dzi rcyiiñ yu,
sinu bicy dey gan nu nac fers ni ru nunu nu nac nu rcyiiñ ru gyicy ru coz ily.
Ndeꞌ nu bicy dey gan de mbecy zeꞌ gyiꞌ nu ru guc nur dey nunu nu nac de coz nu bicy ru.
Gun rabee nu rcar dey.
4 Ru nac ru Rey ne̱, nunu nac ru Ñgyoozh ne̱.
Ru ricy ru nu ricy de mbecy nir gan de gyel yuu.
5 De̱ ya̱ ricy de̱ gan de losaꞌ yu̱u̱, nu nac nu ru rlocyuub ru de̱ ya̱.
Gyiꞌ nu nac de̱ mbecy nir, orzeꞌ zub gyi̱ꞌ de̱ too de losaꞌ yu̱u̱.
6 Ya̱ walab lo guaz ne̱ ricy cupa̱ consuel nu co mbañ ñii ya̱.
Ni walab lo mandzicy ne̱ ricy cupa̱ consuel.
7 Laab ru bloo mbañ ru de̱ ya̱ yaa de losaꞌ yu̱u̱,
nunu bicy ru gan de mbecy nu rzi lagy lo̱.
8 Dub laa tiem griib zily de̱ ru,
nunu gric de̱ gras nir par tub la.
9 Zeꞌ na mneꞌr de̱ ya̱.
“O” rniir nu de mbecy nu gyicy dey gan de̱ ya̱ lat gyel yuu.
Wacha nu gaꞌr de soldad ne̱ de̱.
10 Bicy ru nu brush de̱ carer lo de losaꞌ yu̱u̱.
Orzeꞌ bloo dey de coz ne̱ de̱ ya nuy.
11 “O” mniir nu gat de̱ gal nu rat shily.
Nunu bicy ru nu brush las de̱ ledz reñ ga la mbecy nu a̱ꞌ yuꞌ lo ru.
12 De̱ ya̱, mbecy nir, rlyu nu biit ru de̱, par pres ni tub tiñ miꞌ.
Rlyu nu rila a̱ꞌ sac de̱.
13 De mbecy nu rcyiiñ gaab ga, ornu zac dey de coz nu bicy ru,
orzeꞌ gubdzaa dey de̱ ya̱,
nunu gyigy nu naañ dey de̱ ya̱.
14 Na bicy ru nu byac de̱ tub nac riidz shiꞌ par nu gyigy mbecy.
Ornu rzac dey de̱ ya̱, orzeꞌ nu rgyib ziꞌl too dey nu rgubdzaay de̱ ya̱.
15 Dub laa tiem toꞌ lo rdeda̱.
Ryet ña la lo̱ nu druu gyel mbecy ne̱.
16 Ni rzaca̱ nu nac de riidz rgubdzaa,
de riidz nu rnii zi de losaꞌ yu̱u̱, de yu nu rzi lagy lo̱.
17 Bzac de̱ dela coz ii,
mas rila wannit lagy de̱ ru,
nunu rila wangyicy de̱ coz nu ñgyañ contr ni trat nu bicy nur de̱ ya̱.
18 Walab nu bicy cyup ic de̱ nu mbish cya̱ de̱ par ich.
Ni walab nu bruu chu̱ de̱ lo de coz nu mniir nu gyicy de̱.
19 Zeꞌ na bzaan ru de̱ ya̱ lugaar zeꞌ nu rded de bañ show.
Bzur de̱ ya̱ zeꞌ nu blaazhaꞌ zir cow.
20 Se benu de̱ ya̱ ñgyeca̱ de̱ nu griib zilya̱ ru,
orzeꞌ nne̱e̱ du̱ de̱ reñaꞌ ñgyoozh nab,
21 orzeꞌ waded la gad lagy ru,
gun ru rad lagy ru dela coz ngach nu yuꞌ nañ lardo̱o̱ de̱.
22 Tees nu nac ru, zaab rut la mbecy de̱ ya̱ dub laa tiem.
Nu nac ru, ricy nu mbecy de̱ ya̱,
gal nu ricy nu dey shily ornu rza nu dey ma lo yu nu cut ma.
23 Ñgyoozh Shuaan de̱, briish yaa.
¿Lagu nas ru?
Pcueeñ ub ru.
Cueꞌ neꞌr de̱ ya̱ par tub la.
24 ¿Lagu rcach lor lo̱ de̱?
Cueꞌ nit lagy ru nu rzac zi̱ de̱ nunu rzac deet de̱.
25 Wes saa dat la de̱ lo yu nu blazh baloor ne̱.
Ngua̱a̱ de̱ lat yu gyedz
gal nu nguaa mbecy nu wangyicy gan gyel yuu.
26 ¡Da güiir de̱ ya̱, Ñgyoozh!
Bloo mbañ de̱ nu nac nu zaab rca lar de̱.