43
Ñgyoozh,
mnii nu sac falt ne̱,
nunu gua faboor ne̱ nu nac de mbecy nu a̱ꞌ yuꞌ lo ru.
Bloo nap ya̱ yaa de mbecy rguu nu yaa de mbecy shiñ ricy.
2 Ru biñ nu rza̱ lo nu laa lagya̱.
Orzeꞌ ¿lagu bzaan ru ya̱?
¿Lagu zaab rzac zi̱ la̱ nu nac de coz a̱ꞌ nap nu ricy de losaꞌ yu̱u̱?
3 Blyuu yaa nir lo̱.
Orzeꞌ gad lagya̱ de coz rishli nir.
Orzeꞌ ndeꞌ gyicy ñi nu cush cya̱
nu cha̱ too bicy yon zeꞌ nu zub yuꞌr,
zeꞌ nu zur.
4 Orzeꞌ gyecha̱ꞌ gal lo cuug nir,
Ñgyoozh.
Orzeꞌ zu cyit lagya̱ nu nac ru.
Nunu sheta̱ lo beeñ arpa lor.
Orzeꞌ dula̱ lo ru,
biñ nu nac Ñgyoozh ne̱.
5 ¿Lagu dzi ricy shni̱?
¿Lagu dzi deet rac nañ lardo̱o̱?
Ya̱ grish lo̱ lo Ñgyoozh,
nunu gyabica̱ gyel mbecy nim tuubaꞌ tir.
Mi zeꞌ biñ nu rboo mbañ ya̱,
nunu nac mi Ñgyoozh ne̱.