Libro 2
Ya grish lo lo Ñgyoozh: Tub riidz ni mbecy nez Coré
42
Gal nu rzac dziñ ornu ric la añ ni ma lo nis nu zaab za,orzeꞌ ni mod rzac lardo̱o̱ lo ru, Ñgyoozh nu ric la añ ne̱ lor.
2 Gal nu rzac mbecy ornu rbigy yu nis,
niꞌ ziꞌl rzac ya̱ lo ru, Ñgyoozh mbañ.
¿Gul yapa̱ lor nu griib zilya̱ ru?
3 Dzi rel la rduna̱.
Nis urlo̱ ndeꞌ ziꞌl coz nu rda̱w.
Lat la zeꞌ de losaꞌ yu̱u̱ zaab rnii la dey lo̱.
Orzeꞌ na dey: “¿Ca zu Ñgyoozh nir?” rniiy.
4 Ricya̱ sentiir ornu yezaꞌ lagya̱ de coz nu bi bded.
Gua du̱ de mbecy zigy nañ yuꞌ ni Ñgyoozh.
Bzub lo̱ lo dey nez nu zay.
Gyiꞌ nu dzi bet lagy de̱,
orzeꞌ brishti̱ de̱,
nunu bric de̱ gras nim.
Nunu zigy de̱ tublaazh la bicy de̱ saꞌ lom.
5 Orzeꞌ ¿lagu dzi ricy shni̱?
¿Lagu dzi deet rac nañ lardo̱o̱?
Ya̱ drish lo̱ lo biñ nu co mbañ ya̱,
nunu mi zeꞌ nac mi Ñgyoozh ne̱.
Na gyabica̱ gyel mbecy nim tuubaꞌ tir.
6-7 Ya̱ tonaꞌ la ricya̱ sentiir lat nu rcyiiña̱ ledz reñaꞌ mbecy.
Orzeꞌ ya̱ rcaa ica̱ Ñgyoozh.
Mi zeꞌ ricy mi nu rgo coz shni to̱o̱,
gal nu ricy de nguuly nu rded lo nis ornu goñ toon.
To̱o̱ rzac ñi gal nu ricy nis yu nu druu bicy Hermon,
nu bicy Mizar nu yet ñi par gyoow Jordaang.
8 Or widoo Ñgyoozh zaab rca lam ya̱,
gun orzeꞌ rel wacheca̱ nu rdula̱ lom.
Nunu rne̱e̱ du̱ biñ nu rbic gyel mbañ ne̱.
9 Ya̱ rne̱e̱ lo Ñgyoozh, biñ nu rzaab ic ya̱:
“¿Lagu mnit lagy ru ya̱?
¿Lagu rlagy ñi nu zaab zac deet la̱
nu nac de coz a̱ꞌ nap nu ricy de losaꞌ yu̱u̱?”
10 Ya̱ rze̱e̱ nu dela rita̱ rlaꞌñ ornu rnii zi dey ne̱.
Zaab rnii la dey: “¿Ca zu Ñgyoozh nir?” rnii dey.
11 ¿Lagu dzi ricy shni̱?
¿Lagu dzi deet rac nañ lardo̱o̱?
Na grish lo̱ lo biñ nu co mbañ ya̱, biñ nu nac Ñgyoozh ne̱.
Ndeꞌ nu na gyabica̱ gyel mbecy nim tuubaꞌ tir.