Mbecy rat rnii nuy Ñgyoozh: Tub riidz ni Dabi
41
Dzi ni de mbecy nu zu shcab nu nac de mbecy zi nu de mbecy shni.Ñgyoozh, Shuaan den, locyuub mi de yu zeꞌ tiem nu rac deet.
2 Mi zeꞌ ñam dey, gun orzeꞌ cueꞌ nu shiñ gzac yu.
Nunu wazaan mi nu gat dey.
Nunu gyicy mi nu zu cyit lagy dey lat nu rcyiiñ yu ledz yu.
Nunu wazaan mi nu gyet lag dey yaa losaꞌ yuuy.
3 Mi zeꞌ locyuub mi dey tiem nu garat yu,
nunu gyicy yac mi dey.
4 Ya̱ mne̱e̱: “Ñgyoozh, Shuaan de̱, ya̱ bicya̱ cyi.
Guch ñii ne̱ lor.
Gushni lagy ya̱,
nunu gyicy yac ru ya̱”, mne̱e̱.
5 De losaꞌ yu̱u̱ rnii zi dey ne̱.
Ornu gata̱, orzeꞌ nit lagy mbecy ya̱, rnii dey.
6 De mbecy nu ryiid güii ya̱, walab nu dub gal ri lagy dey ryiid güiiy ya̱.
Ryub dey riidz a̱ꞌ nap nu niiy nu naca̱.
Orzeꞌ rza dey rtush las yu de riidz cuen zeꞌ dela lugaar.
7 De mbecy nu rzi lagy lo̱, rzat dey ya̱ nañ gyid ruꞌ ziꞌl yu nu losaꞌy.
Nunu bded ruꞌ gaꞌ la coz a̱ꞌ nap rnii too dey nu nac de coz nu rzaca̱.
8 Ornu rzat dey ya̱,
orzeꞌ rniiy: “Rat yu nunu wayacaꞌy.
Wayeshte gaꞌy lo daꞌ niy tuubaꞌ tir.”
9 Gashtal amig ne̱ nu dzi zir pca̱, yu nu bdow gyit ne̱, yu zeꞌ bish cyay icha̱.
10 Ñgyoozh, Shuaan de̱, gushni lagy ya̱.
Orzeꞌ gyicy yac ru ya̱.
Sheshter ya̱, gun orzeꞌ gyabica̱ i de losaꞌ yu̱u̱.
11 Gun orzeꞌ wad ruꞌ dey nu niiy nu bicy yu gan ya̱.
Nunu nu nac ndeꞌ, orzeꞌ gad lagya̱ nu ru yet lagy ru de coz nu ricya̱.
12 Blocyuub ya̱ Ñgyoozh,
gun ya̱ ricya̱ mod nu seꞌñ.
Bicy nu ya̱ zu̱ lor par tub la.
13 Gyabic den gyel mbecy ni Ñgyoozh, Shuaan den.
Mi zeꞌ Ñgyoozh ni de mbecy Israeel.
Gyabic den gyel mbecy nim na,
nunu gyabic den gyel mbecy nim par dub laa tiem.
Ni gac ñii.
Ni gac ñii.