Yet lagya̱ gyicya̱ coz nu rlagy Ñgyoozh
40
Nu pase̱z bleza̱ nu locyuub Ñgyoozh Shuaan na.Orzeꞌ mi zeꞌ bzuub gyidag mi ne̱,
nunu güeñ mi de riidz nu mne̱e̱ ornu brishti̱ du̱m.
2 Bloo mbañ mi ya̱
ornu bi zu̱ la̱ nu gyet laga̱ gyerye nu yuꞌ mbecy gut.
Bloo mbañ mi ya̱
ornu bi rzez ti̱ lo gudz ily.
Orzeꞌ bzum ya̱ tub lugaar nu a̱ꞌ rishdzidz.
Orzeꞌ na wacchib la̱ rdeda̱.
3 Zeꞌ na briic mi riidz cub nu dula̱ lom,
riidz cub nu gyabic gyel mbecy nim,
gun mi zeꞌ biñ nu nac Ñgyoozh ni den.
Zigy mbecy, ornu rzac dey de ndeꞌ,
orzeꞌ rdzib lagy dey lom.
Orzeꞌ ricy cup dey consuel laab lo Ñgyoozh Shuaan na.
4 Dzi ni de mbecy benu ricy cup yu consuel lo Ñgyoozh, Shuaan den,
benu wacha dey lo ñgyoozh nab,
ni wagyatublaazh yu nu de mbecy nu driib zily ñgyoozh fals.
5 Ñgyoozh Shuaan de̱, ru zañ coz ily bicy nur de̱ ya̱.
Warusuu gaꞌ cyu nu na gal nu na ru.
Ru bloo ic ru zañ coz nap par de̱ ya̱.
Wacaꞌ zata̱ delañ nu tantaꞌ coz zañ.
Sac numbr ily zir par nu dulab delañ.
6 Ru walagy ru nu cut mbecy bañcyug nu gac ma gun lor.
Ni walagy ru nu cuic mbecy gyez nu gac ñii gun lor.
Ru ni walagy ru nu zaay mbecy bañcyug nu gac ma gun lor.
Ni walagy ru nu cuic mbecy bañcyug lor par nu gyecy cyi dey.
Lugaar nu cyiñ ru de ndeꞌ, orzeꞌ briic ru gyidag de̱ nu gyeña̱ de coz nu rniir.
7 Orzeꞌ ya̱ rne̱e̱ lor, Ñgyoozh: “Ii bi zu̱.
Lo libr ni leey nir, bi cañ ca na de coz nu rlagy ru nu gyicya̱.”
8 Ñgyoozh ne̱, tonaꞌ la yet lagya̱ nu gyicya̱ gal nu ru rlagy ru.
Ya̱ bduꞌ choowa̱ de riidz ni leey nir nañ lardo̱o̱.
9 Ñgyoozh, Shuaan de̱, ya̱ rne̱e̱ de riidz cyit na,
de riidz nu rniiñ nu rboo mbañ ru de̱ lat de mbecy zigy nir nu yuꞌ tublaazh.
Ru rad lagy ru nu ya̱ rila wasoow ruꞌ nu nac de nu ndeꞌ.
10 De riidz nir, walab nu bduꞌ choowa̱ñ nañ lardo̱o̱ par ub ziꞌl la̱,
sinu ya̱ rne̱e̱ nu ru ricy paar nu de mbecy nir,
nunu rboo mbañ ru dey.
Ya̱ walab nu psoow ru̱ꞌ
ornu yuꞌ tublaazh de mbecy nir,
sinu rne̱e̱ lo dey nu ru zaab rca lar dey,
nunu ricy ru gal mod nu rlagy ñi.
11 Ñgyoozh, Shuaan de̱, ya̱ rad lagya̱ nu wayecar nu rashni lagy ru ya̱.
Ru zaab rña lar ya̱ nu nac nu rcar ya̱,
nunu ricy nur ya̱ gal mod nu rlagy ñi.
12 Zañ coz deet bri loꞌ lañ ya̱.
Ni wacaꞌ dulab ñi nu tantaꞌ zañ ñi.
Bi brugyiꞌ nu rzac zi̱ nu nac de cyi̱.
Ni wagad lagya̱ꞌ la̱ lac mod gyicya̱.
Zañ zir ñi gazeꞌ de gyich to̱o̱.
Blaazh la̱ baloor.
13 Cua̱a̱ ya̱, Ñgyoozh, Shuaan de̱, bloo mbañ ya̱.
Bicy lal blocyuub ya̱.
14 Bicy nu nit lo de mbecy nu rlagy cut ya̱,
nunu bicy nu gyach dey laab nu losaꞌy.
Bicy nu cush cya mbecy ich de yu nu yet lagy nu rzac deeta̱,
nunu bicy nu gruu gyel mbecy ni dey.
15 De yu nu rigy nu naañ ya̱, bicy nu gruu toꞌ lo dey,
nunu gash dey carer.
16 Tees de mbecy nu ryub ru, bicy nu zu cyit lagy dey,
nunu gyet lagy yu.
Orzeꞌ dela mbecy nu rbic gras nu nac nu rboo mbañ ru dey,
orzeꞌ delay niy: “Tonaꞌ la zily nac Ñgyoozh Shuaan den”, niiy.
17 Ñgyoozh, Shuaan de̱, ya̱ naca̱ tub mbecy shni,
nunu naca̱ mbecy nu ricy falt ni,
tees ru wanit lagy ru ya̱.
Ru biñ nu rlocyuub ya̱,
nunu nac ru biñ nu rboo mbañ ya̱.
Orzeꞌ bicy lal.
¡Da güiir ya̱, Ñgyoozh!