Lo yu mbecy dzi shub ñii: Tub riidz ni Dabi
39
Ya̱ mneꞌ ica̱ nu gyicy cuidada̱ mod nu gyicya̱.Nunu wazaana̱ nu gyicya̱ cyi nu ru̱ꞌ.
Ya̱ soowa̱ ru̱ꞌ ornu de mbecy a̱ꞌ nap yuꞌy lo̱.
2 Ya̱ bicya̱ nu na̱ gal na gop.
Wane̱e̱ ni tub la coz.
Ni riidz nap wane̱e̱.
Tees dzi zir bzac zi̱.
3 Psuun lañ ya̱ tantaꞌ nu psug ica̱.
Ornu brusha̱ shcab nu nac ndeꞌ,
tonaꞌ la deet guc nañ lardo̱o̱.
Orzeꞌ ya̱ dub ru̱ꞌ la̱ brishti̱ du̱ ru.
Orzeꞌ mne̱e̱:
4 “Ñgyoozh, bicy nu gad lagya̱ gul gata̱.
La be ruꞌ tiem nu cui mbaña̱.
Rlagya̱ gad lagya̱ nu dzi ga shub lo yu̱.
5 Ru bicy ru nu dzi shub lo yu̱.
Par ru tub miiñ ziꞌl rcyiiña̱ gyishlombecy.
Dela mbecy na lo yuy gal na tub nu gyash lagy na.
6 Dela mbecy rded ni dey gal nu rded tub sheñ.
De la coz nu ricy dey, se la la ndeꞌ.
Se la la cyiiñ ñi ni dey nu cyaañ yu de gyel nap,
gun wagad lagy yu cyu gyiyeeñ nuñ.
7 Ñgyoozh, sac laꞌ zir coz nu leza̱,
tees ya̱ drish lo̱ lor.
8 Bicy nu gla̱ ni cyi̱.
Orzeꞌ cueꞌ zaan ru nu gyigy nu de mbecy ton ya̱.
9 “Ya̱ bicya̱ gal nu ricy gop.
Orzeꞌ wane̱e̱ la̱ ni tub la riidz.
Gun ru bicy ru nu ni bzaca̱.
10 Cueꞌ cuic ru cashtig ne̱,
gun ya̱ bi rlazha̱ nu nac cashtig nu rbic ru.
11 Ru rshuu nur mbecy nu nac cyi nu ricy yu.
Nunu rnit lor de coz nu rcaa zir lagy yu.
Dela mbecy na dey gal nu na tub nu gyash lagy na.
12 “Ñgyoozh, bzuub gyidag ne̱ ornu rne̱e̱ du̱ ru.
Bduꞌ cuen de riidz shni nu rne̱e̱ lor.
Bduꞌ cuen ornu ya̱ rduna̱.
Gun par lo ru ya̱ na̱ gal na tub mbecy zu nez
gal nu bzacaꞌ ziꞌl de gyitoo bel ne̱.
13 Cueꞌ gaꞌ güii tañ ru lo̱, gun orzeꞌ gacyit lagya̱.
Gun ya̱ sñuu ga ziꞌl bi ru̱u̱ gyishlombecy ii.”