Tub mbecy rat rnii nuy Ñgyoozh: Tub riidz ni Dabi
38
Ñgyoozh, cueꞌ gyidzaꞌr ne̱ nu nac nu rzi lagy ru.Ni cueꞌ cuic ru cashtig ne̱ nu nac nu rchaꞌ ic ru.
2 Gun nañ gal na nu pcad güiir ya̱ nu gyech ni guaz.
Nañ gal na nu pshes saar ya̱ lo yu nu yaar.
3 Ru rzi lagy ru lo̱ nu nac de cyi̱.
Ndeꞌ nu na dela lugaar ni cuerp ne̱ rac niñ gal nañ rit la.
4 De cyi̱ byañ ñii gashtal wagagye̱e̱ ga̱ꞌ la̱.
Nañ gal na tub yuu ye nu wacaꞌ la du̱ tantaꞌ nu yeñ.
5 Nu nac nu bicya̱ coz ton,
orzeꞌ güii nu ricy cupa̱ driib guudz loñ nunu shiñ tiꞌñ.
6 Briish ñi ya̱ lo daꞌ.
Orzeꞌ gua la dzi bicya̱ sentiir.
7 Zig ily pcaañ ne̱.
Nunu coz ily rata̱.
8 Guud la ne̱.
Blazh la fers ne̱.
Se nu rzuub tiꞌ ziꞌla̱ gal nañ lardo̱o̱.
9 Ñgyoozh, ru rad lagy ru dela coz nu rlagya̱.
Nunu ornu rne̱e̱ riidz shni̱,
ndeꞌ walab tub coz ngach par ru.
10 Fert ca añ ne̱ nunu blazh la fers ne̱.
Se dzeeñ dzeeñ ziꞌl rzaca̱.
11 De amig nap ne̱, nunu gashtal de famil ne̱, zet yuꞌy.
Walagy dey gyechaꞌy lo̱ nu nac güii ne̱.
12 De mbecy nu rlagy cut ya̱ rzu dey caa ne̱.
De yu nu rlagy gyicy ras nu ya̱, de yu zeꞌ rnii dey nu nit loy ya̱.
Dub laa tiem rboo ic dey lac mod cush cyay icha̱.
13 Tees ya̱ ricya̱ nu na̱ gal nu na go̱ꞌ.
Ricya̱ nu wagyeña̱.
Ricya̱ nu na̱ gal nu na gop.
Ricya̱ nu wagac ne̱e̱.
14 Ya̱ na gal nu na tub mbecy nu wagyeñ.
Nunu wagne̱e̱ ni tub la riidz par nu ca̱ uba̱.
15 Ñgyoozh, ya̱ leza̱ ru,
gun laab ru tush cyar ni dey.
16 Ya̱ rdiña̱ lor nu cueꞌ zaan ru nu gyigy nu dey ya̱.
Cueꞌ nu nii leꞌy ornu glagy gyi̱ꞌ.
17 Ya̱ bi zu̱ nu gyes sa̱a̱.
Wacheca la nu rac ne̱.
18 Ya̱ shuub ru̱ꞌ de cyi̱,
gun tonaꞌ la deet rac nañ lardo̱o̱ nu nac ñii.
19 De losaꞌ yu̱u̱ byañ dey.
Nunu zigy mbecy rzi lagy yu lo̱.
Zeꞌ sac la la gyiꞌ rzi lagy yu lo̱.
20 Yuꞌ mbecy, ornu nap ricy du̱ yu,
orzeꞌ rgyish dey ne̱ nu coz a̱ꞌ nap.
De yu zeꞌ zay contr ne̱ nu nac nu ricya̱ coz nu seꞌñ.
21 Ñgyoozh, Shuaan na̱ cueꞌ zeeñ ru ya̱ ub zi̱.
Nunu cueꞌ gya zet ru lo̱.
22 Ñgyoozh, biñ rboo mbañ ya̱, bicy lal da locyuub ru ya̱.