Coz nu rzac mbecy nap gal nu mbecy a̱ꞌ nap: Tub riidz ni Dabi
37
Cueꞌ sug ic ru nu nac de mbecy dañ.Ni cueꞌ gasaap lagy ru nu nac nu rzup de mbecy nu shiñ ricy.
2 Gun de yu zeꞌ nit dey gal nu rac nu gyizh ornu rawach ñi.
Gat dey gal nu rzac gyish ornu rziiñ.
3 Bicy cup consuel lo Ñgyoozh, nunu bicy coz nap.
Pcyiiñ ledz ru, nunu bicy paa nu de coz rishli.
4 Gucyit lagy lo Ñgyoozh.
Orzeꞌ cuic mi de coz nu rlagy ru nañ lardoor.
5 Bguꞌ ub ru yaa Ñgyoozh.
Bicy cup consuel lom.
Orzeꞌ mi zeꞌ locyuub mi ru.
6 Orzeꞌ gyicy mi nu naal la rabee nu sac falt nir,
nunu gyicy mi nu de coz seꞌñ nu ricy ru gabeñ
gal nu rabee yaa ni doo güidz orwi doo.
7 Ri bzu lo Ñgyoozh.
Nu pase̱z blez nu locyuub mi ru.
Cueꞌ sug ic ru nu nac nu rzup de mbecy.
Ni cueꞌ sug ic ru
benu druu nap de coz a̱ꞌ nap nu rboo ic de mbecy nu gyicy yu.
8 Cueꞌ shet ic ru nu gazi lagy ru.
Cueꞌ cuic ru gusht ni nu chaꞌ ic ru.
Cueꞌ gazi lagy ru, gun ndeꞌ gyicy ñi nu deet zir gzac ru.
9 De mbecy a̱ꞌ nap co Ñgyoozh dey ledz yu.
Tees de yu nu ricy cup consuel lom, de yu zeꞌ gyac ni dey ñi.
10 Nañ se la be ziꞌl tiem, orzeꞌ sacaꞌ de mbecy a̱ꞌ nap.
Mas nap yub ru dey, tees wayadaꞌy nir.
11 Tees de mbecy nu wagyicy gyel lily ni, de yu zeꞌ gyac ni dey ledz yu.
Nunu gyicy dey gusht nuy ñi nu gyel ri zu.
12 Mbecy a̱ꞌ nap rboo ic yu lac mod shiñ gyicy nuy mbecy nap.
Gyi la ri loy rgüiiy loy tantaꞌ nu rzi lagy yu.
13 Tees Ñgyoozh rigy num de mbecy a̱ꞌ nap,
gun neñ mi nu bi shuub dzi nu nit lo dey.
14 De mbecy a̱ꞌ nap rboo zay mandzicy niy,
nunu rgayuy duu lyar ni guaz niy
par nu cut yu de mbecy zi gal nu de mbecy nu ricy falt coz ni
nunu par nu cut yu de mbecy nu ricy coz nu seꞌñ.
15 Tees de yu zeꞌ gat yu laab nu mandzicy niy.
Nunu guaz ni dey laazh lañ duzug ñi.
16 De coz miꞌ nu ricy cup de mbecy nap, ndeꞌ dzi zir sac ñi
gazeꞌ de coz sheñ nu ricy cup dela mbecy a̱ꞌ nap,
17 gun Ñgyoozh gyicy mi nu se la la cyiiñ de mbecy a̱ꞌ nap.
Zeꞌ de mbecy nap güiim dey.
18 Ñgyoozh güiim de mbecy nu sac falt ni,
nunu gyel nap nu gyiyeeñ yaa dey, ndeꞌ gzuñ tub la.
19 Ornu deet rac, ornu cyid cubiñ,
orzeꞌ waruu gyel mbecy ni dey,
nunu gyicy cup dey sheñ coz nu gow yu.
20 De mbecy a̱ꞌ nap nit lo dey gal nu rzac gyish ornu rca gyiñ.
De losaꞌ yuu Ñgyoozh nit dey gal nu rnit dzeeñ.
21 Mbecy a̱ꞌ nap rbooy la coz.
Orzeꞌ rila wagyabic yuñ.
Zeꞌ mbecy nap, yu zeꞌ dub gal rii la lagy yu rbic yu la coz ni losaꞌy.
22 De mbecy nu Ñgyoozh nap ricy num, de yu zeꞌ gyiyeeñ yu yaay.
Tees de yu nu rzaa lagy mi ni, de yu zeꞌ cyuu num yu ledz yu.
23 Ñgyoozh rlyuum ni mbecy lac mod rlagy ñi nu gyicy yu.
Nunu ricy mi nu a̱ꞌ rishdzidz cyiiñ de yu nu racyit lagy mi lo.
24 Mas gyes saay, tees walab nu wayeshte gaꞌy lo yu,
gun Ñgyoozh locyuub mi yu nu gyeshtey.
25 Gulas gufeña̱.
Zeꞌ na guusha̱.
Tees rila nigul zaca̱ nu Ñgyoozh zaan mi tub mbecy nap.
Nunu rila nigul zaca̱ nu de i̱ꞌñ dey cyiñ yu gun nu gow yu.
26 De yu zeꞌ zaab rashni la lagy yu losaꞌy,
nunu rbic yu coz nu co dey.
Nunu de i̱ꞌñ yu nac dey gyel nap nu briic Ñgyoozh niy.
27 Bruu chu lo de coz a̱ꞌ nap.
Orzeꞌ bicy coz nap.
Orzeꞌ dub laa tiem gad lugaar nu cyiiñ ru.
28 Gun Ñgyoozh yet lagy mi coz nu seꞌñ,
nunu wazaan mi de mbecy nu ricy paa nim.
Tees de mbecy a̱ꞌ nap nit lom dey
nunu wazeeñaꞌm nez yu.
29 De mbecy nap gyiyeeñ ledz dey yaay,
nunu cyiiñ dey loñ tub la.
30 Mbecy nap rniiy riidz lily,
nunu rniiy gal mod nu rlagy ñi.
31 Nañ lardooy ri leey ni Ñgyoozh,
nunu rila wacyuu chuy loñ.
32 Mbecy a̱ꞌ nap rsiiñ yu ni mbecy nap,
gun rlagy yu nu cut yuy.
33 Tees Ñgyoozh wazaan mi nu gyet lag yu yaa yu zeꞌ.
Nunu wazaan mi nu ruu fals yu
ornu gri bee mbecy niy.
34 Tees ru briish lo lo Ñgyoozh,
nunu bzuub gyidag nim.
Gun orzeꞌ gyicy nu gya zur.
Nunu ledz ru ndeꞌ gyel nap nu zeeñ mi yaar.
Nunu zac urlo lar, ornu nit lo de mbecy a̱ꞌ nap.
35 Ya̱ rzaca̱ mbecy a̱ꞌ nap nu ricy ñgyay lo losaꞌy.
Ricy zily yu ub yu gal nu na tub yag ily.
36 Ya̱ bdeda̱ zeꞌ nu bzuy tuubaꞌ tir, tees sacaꞌy.
Byuba̱ yu, tees wangyadaꞌy.
37 Bduꞌ cuen de mbecy nap gal nu de mbecy nu sac falt ni.
Gun mbecy nu ri ri añ ni, yu zeꞌ gruu nap yu par lo.
38 Tees de mbecy nu ricy cyi, de yu zeꞌ nit lo zaꞌ la dey.
Coz nu zac de mbecy a̱ꞌ nap par lo ndeꞌ nu nit loy.
39 Ñgyoozh rlocyuub mi de mbecy nap.
Tiem nu deet rac, orzeꞌ lom cha dey nu laa lagy yu.
40 Ñgyoozh rlocyuub mi dey nu gruu chuy.
Co nap mi dey yaa mbecy a̱ꞌ nap,
nunu co mbañ mi dey.
Gun lo mi zeꞌ cha dey nu laa lagy yu.